भांगरभूंय | प्रतिनिधी
आमच्या पुर्वजां तेंपार शिगम्याकूच कार्नाव्हालाचें रुप दिलां आसतलें. शिगमो धर्मिकतायेक लागीं तर कार्नाव्हालाचेर पश्चिमी संस्कृतायेचो प्रभाव दिसता. हे दोनूय उत्सव फाटोफाट हातांत हात घालून येतात. पद्दतूय लागीं लागीं तशीच. म्हणल्यार शिगम्यांत धोल, ताशे वाजयतात. टिपरी खेळटात, तालगडी, रोमटां मेळ, गडे, खेळे. दोनूय उत्सवांनी मुखामळार वेगवेगळीं म्होंवाळीं, दोळ्यांक गाॅगल, माथ्याक रंगीत तोपयो, चेपीं, वेगळेच तरेची मुस्तायकी करतात.
शिमग्याक, कार्नाव्हालाक एक उमेदीचें वातावरण आसता. गोयांत ह्या उत्सवाची तयारी नेटान जाता. सध्या कार्नाव्हाल सुरू जाला. तातूंतले चित्ररथ, नाच पळोवपा सारके आसतात. पणजी, मडगांव, म्हापशें, फोंडें आनी हेर शारांनी सरकारा वतीन हो उत्सव दबाज्यान मनयतात. तातूंत पारंपरीक पद्दतीन शेंकड्यांनी लोक वांटेकार जातात. पदां म्हणटात. नाचतात. चित्ररथ आसतात. सरकारी खात्यांचेंय साबार चित्ररथ आसता. वेगवेगळे भेस केल्ले तरणाटे आसतात. कार्नाव्हालाचो हो सुवाळो पळोवपाक देश, विदेशांतले शेंकड्यांनी पर्यटकूय येतात.
तरणाटी पिळगी जानेवारी सावनूच कार्नाव्हालाच्या चित्ररथाची तयारी करतात. रातीचे दीस करून ते सोबीत चित्ररथ तयार करतात. हाका लागून तांचे मदलो कलाकार विकसीत जाता. हे चित्ररथ कार्नाव्हाल मिरवणुकेचें खाशेलें आकर्शण आसता.
हो उत्सव सगल्या धर्माच्या लोकांक एकठांय हाडटा. हातांत हात घालून तरेकवार गीतां गावपाचो हो आगळो सण. ल्हान भुरग्यांक तर वेगवेगळे भेस केल्ले मनीस, विदुशक बी पळोवन बरीच उमेद जाता. तीं खोशेन नाचूंक लागतात.
उत्सव खंयच्याय धर्माचो आसूं. एकमेकांच्या सांगातान तो मनोवप ही दरेकल्याची जापसालदारकी. कारण हे सण, उत्सव सगल्यांक आनंद, समाधान दितात. तें मेळप हो उत्सवा फाटलो मुखेल हेतू. सदच्या वाजेवण्या कामा पसून मात्शी तकली वयर काडून उमेदीन, खेळीमेळीच्या वातावरणांत रमून वचप म्हणल्यार कार्नाव्हाल सारक्या उत्सवांत वाटेकार जावप. जात, धर्म, गरीब, गिरेस्त असो भेदभाव करीनासतना एकाच पांख्या सकयल वावुरपाची ही संद. सगल्यांक कार्नाव्हालाचीं परबीं.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
