भांगरभूंय | प्रतिनिधी
आयच्या तणावाच्या वातावरणांत मात्शी तकली वयर काडून उत्साही वातावरणांत वावुरपाचो, खोस लुटपाचो हो भांगराळो खीण
आमचे हिंदू लोक शिमगो मनयतात. धोल- ताशे वाजयतात. मुखामळांचेर रंगीत म्होंवाळीं घालून, माथ्याक रंगबिरंगी तोपयो, तांबडीं- पांचवीं वक्लां घालून तरेकवार मुस्तायकी करतात. तशेच आमचे क्रिस्तांव भाव एकठांय येवन कार्नावाल करतात. शिमगो आनी कार्नावलाचे मिरवणुकेक आयज तशेंच रुप, म्हत्व आयल्या. दोनूय कडेन तितलीच उमेद दिसता. शिमगो धर्मीकताये कडेन लागीं, तर कार्नावालाचेर पश्चिमी संस्कृतायेचो प्रभाव दिसता. हे दोनूय सण एकामेकां फाटोफाट येतात. पद्दतूय लागीं लागीं सारकीच. मौज, मजा, उमेद हांचो हो त्रिवेणी संगम.
सद्या गोंयच्या साबार वाठारांनी कार्नावालाची तयारी चल्ल्या. कोण चित्ररथ करता, तर कोण नाचाची येसाय मारतात. तरणाटे जानेवारी सुरू जालो काय रोखडेच चित्ररथाचे तयारेक लागतात. रातीचे दीस करतात. लोकांनी तोखणाय केली काय तांकां बरें दिसता. नवी उर्बा मेळटा. ते सगले कार्नावालाच्या दिसाची वाट पळयतात. तरणाटे, भुरगे हांचे मदीं उमेदीचें वातावरण आसा. म्हापशें, मडगांव, वास्को, पर्वरी, पणजे हो उत्सव जाता. ताका अक्षरशा हजारांनी लोक येतात. पणजे शारांतली येरादारी पसून दनपरां तीन वरां उपरांत बंद दवरतात. फेब्रुवारीचे 10 तारखे सावन (शेनवार) तो सुरू जाता.
चित्ररथ मिरवणुकींतले चित्ररथ पळोवपा सारके आसतात. तातूंत पाडेली, दोतोर, नुस्तेकार, पुलीस, ड्रायव्हर अश्यो साबार तरेच्यो मुस्तायकी घालून उमेदी तरणाटे वावुरतात. चले, चलयो पश्चिमी संगीत, कोंकणी संगिताचेर नाच करतात. पदां म्हणटात. देश- विदेशांतले पर्यटक कार्नावाल पळोवपाक मुद्दाम येतात. ब्राझिलांत जाता, तसलो हो कार्नावाल न्हय. हांगा आमची सभ्यताय पाळून सगले तो मनयतात. कांय पर्यटक मात बियरीचे कॅन हातांत धरून दिसतात!
कार्नावाल म्हणल्या सगल्या धर्मांचो एकवट. हातांत हात घालून उमेदीन तरेकवार पदां गांवपाचो हो दीस. मिरवणुकींतलें संगीत आयकून सगल्यांक नाचन दिसता. विदुशक, किंग मोमो पळोवन भुरग्यांचें मनोरंजन जाता. जण एकल्याक खोस, आनंद मेळचो हो उत्सवा फाटलो हेतू.
आयच्या तणावाच्या वातावरणांत मात्शी तकली वयर काडून उत्साही वातावरणांत वावुरपाचो, खोस लुटपाचो हो भांगराळो खीण, अशें समजुया. कार्नावाल, शिमगो हांच्या माध्यमांतल्यान आमच्या गोंयाक साबार कलाकार, चित्रकार मेळ्ळे. तांच्या सुप्त गुणांक वाव मेळ्ळो. हाचे मुखारुय मेळटलो. गोंय ही कलेची खण म्हूण वळखतात, ती हेच खातीर. कार्नावालाची सगल्यांक हुनहुनीत परबीं.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
