भांगरभूंय | प्रतिनिधी
मुख्यमंत्री : पणजे कार्नावाल व्हडा उमेदीन
भांगरभूंय । प्रतिनिधी
पणजी : गोंय हें पर्यटन थळ म्हूण मुखार व्हरतना आमी सांस्कृतीक पर्यटनाक उर्बा दितले. गोंय हें पर्यटन थळ म्हूण फामाद करपा खातीर कार्नावालाचो व्हडलो वांटो आसा. फुडले आठ दीस पर्यटक आनी गोंयकारांनी कार्नावालांत व्हडा उमेदीन वांटेकार जावचे, असो उलो मुख्यमंत्री डॉ. प्रमोद सावंत हांणी मारला.
पणजे शेनवारा कार्नावला व्हडा उमेदीन मनयलो. परंपरीक भेसांत आशिल्लो किंग मोमो सेड्रीक दा कोस्ता हो कार्नावालाचें मुखेल आकर्शण आशिल्लो. ताणें कार्नावालाचो जाहीरनामो वाचले उपरांत मिरवणुकेक सुरवात जाली. हो उत्सव सगल्यांनी उमेदीन, एकचारान आनी जापसालदारकेन मनोवपाचो उलो किंग मोमो हांणी मारलो.
मुख्यमंत्री डॉ. प्रमोद सावंत हांचे हस्तुकीं कार्नावालाचे मिरवणुकेक बावटो हुबोवन सुरवात जाली. ह्या वेळार पर्यटन मंत्री रोहन खंवटे, राज्यसभा खासदार सदानंद शेट तानावडे, गोंय पर्यटन उदरगत म्हामंडळाचे अध्यक्ष केदार नायक, पर्यटन खात्याचे संचालक केदार नायक आनी हेर अधिकारी हजर आशिल्ले.
पुराय गोंयांतले लोक तशेंच देशी आनी विदेशी पर्यटक वर्सान वर्स कार्नावाल मनोवपा खातीर पणजे येतात, अशें मुख्यमंत्र्यान म्हणलें. आमी सांस्कृतीक पर्यटनाक व्हड प्रमाणांत उर्बा दितात आनी गोंय हें पर्यटन राज्य आशिल्ल्यान कार्नावाल, शिगमो, चिखल कालो सारकिल्ले विविध सांस्कृतीक महोत्सवाक उर्बा दिता. गोंय हें पर्यटन थळ म्हूण फुडें व्हरपा खातीर कार्नावाल म्हत्वाची भुमिका करता. किंग मोमो फु़डले आठ दीस गोंयांतल्या वेगवेगळ्या वाठारांनी कार्नावाल व्हड उमेदीन मनयतले. सगले गोंयकार ह्या कार्नावालांत वांटेकार जातले, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
