भांगरभूंय | प्रतिनिधी
कार्टून कलाकार हो प्रेस आनी मिडियाचो गरजेचो भाग
तिरुवनंतपुरम, खबरां संस्था ः कार्टून कलाकार (व्यंगचित्रकार) हो प्रेस आनी मिडियाचो एक गरजेचो भाग अशें केरळ उच्च न्यायालयान म्हणला. ह्या संदर्भांत भारताच्या संविधानाच्या कलम 19 (1) (ए) प्रमाण तांकां अभिव्यक्ती स्वातंत्र्याचो अधिकार दिला. अशी टिप्पणी करुन उच्च न्यायालयान राष्ट्रीय ध्वजाचो अपमान केल्ल्यान राष्ट्रीय सन्मानाचा अपमान प्रतिबंधक कायदा, 1971 च्या कलम 2 खाला दाखल केल्लो खटलो न्हयकारलो.
चड म्हायती प्रमाण, ‘मल्याळम मनोरमा’न 70 व्या स्वातंत्र्य दिसा महात्मा गांधी आनी भारतीय ध्वजाचें कार्टून चित्र उजवाडायल्लें, तातूंत केसरी भागाचो वयलो भाग काळ्या रेशेन दाखयल्लो. उपरांत भाजपा राज्य समितीच्या सरचिटणीसान कागाळ दाखल केल्ली. एफआयआर आनी क्लोजर रिपोर्ट रद्द करपाची मागणी याचिकादारांनी केल्ली.
चित्रकाराक मत उक्तावपाचो अधिकार
न्यायाधीश पी व्ही कुन्नीकृष्णन हांणी सुनावणी वेळार सांगलें, कार्टून चित्रकाराचे ल्हान रेखाटन हें एक शक्तिशाली दृश्य जे प्रेक्षकाक आकर्शित आनी प्रेरीत करता. कार्टून चित्र हो एक प्रेस आणि मीडियाचो म्हत्वाचो भाग. संविधाना प्रमाण तांकां अभिव्यक्ती स्वातंत्र्यय मेळ्ळां.
मुळाव्या हक्कांक लागून तांकां कार्टून, कार्टून व्हिज्युअल आनी हेर प्रकारच्या स्वरुपांत तांची मतां, कल्पना आनी सृजनशीलताय उक्तावपाक मेळटात. पूण ह्या स्वातंत्र्याचेर संविधानाच्या कलम 19 (2) खाला कांय निर्बंध आसात, जाका लागून देशाचो एकवट आनी अखंडटायेचेर परिणाम जायना.
सुनावणे वेळार न्यायालयान सांगलें…
० राष्ट्रीय सन्मानाचो अपमान प्रतिबंधक कायद्याच्या कलम 2 खाला ख्यास्त दिवपी गुन्यांव करपा खातीर अपमान हो शब्द गरजेचो घटक अशें न्यायालयान सांगलें. हाचे खाला राश्ट्रध्वजाचो आनी संविधानाचो अपमान केल्यार 3 वर्सांमेरेन बंदखण वा दंड वा दोनूय अशी ख्यास्त तरतूद आसा.
० सादारणपणान अपमान हो शब्द अपमानकारक टिप्पणी, कोणाचोय आत्मसम्मान वा स्वाभिमान उणो करपाचो हेत, राग वा दुस्मानकाय निर्माण करपाचो वा तिरस्कार करपाचो हेत आसूं येता अशें समजतात अशें न्यायालयान सांगलें.
० कायदो 1971 हो राश्ट्रीय सन्मानाचो अपमान जावचो न्हय म्हूण आसा. राश्ट्रीय सन्मानाचो अपमान करपाच्या हेतान कसलीच कृती मुद्दाम केल्ली ना जाल्यार कायदो 1971 ची तरतूद लागू जावची ना. देखून याचिकादाराचेर केल्ली कारवाय रद्द केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
