भांगरभूंय | प्रतिनिधी
मुख्यमंत्रीः ज्येश्ठ नागरिकांकूय देवदर्शन यात्रेंतल्यान संद मेळटली
भांगरभूंय । प्रतिनिधी
मडगांवः श्रीराम मंदिराचे उबारणेंत कारसेवकांचो व्हड वांटो आसा. ते खातीर श्रीराम मंदीर प्राणप्रतिश्ठापने उपरांत सगळ्यांत आदीं तांकां अयोध्येक व्हरपाची संद गोंय सरकारा वतीन करतले. तशेंच मुख्यमंत्री देवदर्शन येवजणे खाला गोंयांतल्या भावितांक राम मंदिराचें दर्शन करपाक दितले, अशें आस्वासन मुख्यमंत्री डॉ. प्रमोद सावंत हांणी दिलें.
मडगांवच्या रवीन्द्र भवनांत अयोध्येंतल्या श्रीराम मंदीर प्राणप्रतिश्ठापनेचे फाटभुंयेर गीतरामायण ही कार्यावळ सादर जाली. ह्या वेळार मुख्यमंत्री डॉ. सावंत हांचे सयत आदले आमदार दामोदर नायक, आदले मंत्री चंद्रकांत कवळेंकार, नगराध्यक्ष दामोदर शिरोडकार माचयेर हाजीर आशिल्ले. ह्या वेळार मुख्यमंत्र्यांचे हस्तुकीं कांय कारसेवकांचो सत्कार केलो.
श्रीराम मंदिराची प्राणप्रतिश्ठापना जाता हें अणभवपाचें आमकां सगळ्यांक भाग्य मेळ्ळें. हें देवूळ बांदपांत कारसेवकांचो वांटो सगळ्यांत चड आसा. तांणी त्या वेळार सांचो मातये भरवण केलो, ते खातीर आयज श्रीराम मंदीर उबें जालें. त्या कारसेवकांचो सत्कार करपाची संद मेळ्ळी हें आपलें भाग्य समजतां, अशें मुख्यमंत्र्यान सांगलें.
श्रीराम मंदिरांत प्राणप्रतिश्ठापना जाता व्हर्चुयल पळोवपाक मेळटलें. गोंयांत सध्या राममय वातावरण निर्माण जालां. ह्या उत्सवांत सगळ्यांनी वांटेकार जावचे. हे आदीं राममंदीर बरी बनायेंगे तारीख नही बतायेंगे अशें म्हणटाले. तांकां आपूण सांगपाक सोदतां, राममंदीर वही बनाया, तारीक 22 जानेवारी है. आतां जें बांदलां ते राममंदीर राष्ट्रमंदीर आसा, अशें मुख्यमंत्र्यान सांगलें.
राममंदिरांत प्राणप्रतिश्ठापना जाले उपरांत रामलल्ला दर्शनाचो पयलो मान हो कारसेवकांचो आसा. गोंय सरकारा वतीन कारसेवकांक अयोध्येक धाडपाची वेवस्था करतले. ते उपरांत मुख्यमंत्री देवदर्शन यात्रे वरवीं 60 वर्सां पिराये वयल्या नागरिकांक अयोध्येक व्हरपाची वेवस्था करतले. तशेंच हेर भाविकांक लेगीत रामलल्लाच्या दर्शनाचो योग निश्चीत येतलो, अशेंय मुख्यमंत्री डॉ.राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
