भांगरभूंय | प्रतिनिधी
कारवार, खबरां संस्था : विनायक नायक हांच्या खुनाचें कारण आजूनय स्पश्ट जावंक ना. मात, ह्या प्रकरणांतलो मुखेल दुबावीत गुरुप्रसाद राणेची कूड गोंयांत सांपडिल्ल्यान ह्या प्रकरणांतलो घोळ आनीक वाडला, अशी म्हायती कारवारचे अधीक्षक नारायण एम. हांणी कारवाराक घेतिल्ले पत्रकार परिशदेंत दिली.
हे विशीं मुखार सांगतना नारायण एम. हांणी, विनायक नायक हांच्या खून प्रकरणांत बिहारांतल्या अजमल जाबीर, मासूम मंजूर ह्या दोगांक दिल्ली पुलीस आनी रेल्वे पुलिसांचे मजतीन अटक केल्या. गुरुप्रसाद राणे हांचे सयत तांचे कंपनींत कामाक आशिल्ल्या आसामांतल्या लक्ष्य ज्योतिनाथ हाका गोंय विमानतळार अटक केली.
बिहाराच्या दोगांक ५०- ५० हजार रुपया दिवन गोंय सोडपाक सांगिल्लें. ते प्रमाण ते दोगूय मडगांव रेल्वे स्टेशनां कडल्यान दिल्लीक गेल्ले. जाल्यार लक्ष हाका एक लाख रुपया दिवन गोंय सोडपाक सांगिल्लें. ते प्रमाण लक्ष्य गोंय सोडपाचो यत्न करता आसतनाच गोंय विमानतळावर ताका अटक केली. नंबर प्लेट नाशिल्ली गोंयची गाडी घेवन हे आरोपी खून करपा खातीर आयिल्ले. हे गाडयेचो तपास करतना गुरुप्रसाद राणे हांणी ही गाडी घडणुकेच्या आदीं दोन दीस पयलीं भाड्यान घेतिल्ली, अशी म्हायती पुलिसांक मेळ्ळी. ते प्रमाण पुलिसांनी तपास केलो तेन्ना ही गाडी गुरुप्रसाद राणेचो रायट हॅन्ड म्हणून वळखपी लक्ष हो वापरता अशें समजलें. ते प्रमाण लक्ष हाका अटक केली.
विनायक नायक हांचो खून करपा फाटल्यान वैयक्तीक कारण, दुस्वास आसपाक शकता. हे विशीं आजूनय आमी कोणाच्याच कुटुंबा कडेन चवकशी करूंक ना. मात, गुरुप्रसाद राणे हाका मरण आयिल्ल्यान सत कितें तें भायर काडपाक कठीण जालां. आतां लक्ष हो दुबावीत आरोपी गुरुप्रसाद राणे हांचे लागींचो आशिल्ल्यान ताची चवकशी सुरू आसा. मात, आजूनय तांणी तोंड उगडूंक ना, अशें नारायण एम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
