भांगरभूंय | प्रतिनिधी
फाटल्या सप्तकांत मंगळूर पावलों. विश्व कोंकणी केंद्रांत रवीन्द्र केळेकार आनी मनोहरराय सरदेसाय जल्मशताब्दी निमतान कार्यावळ आसली. दोन दिसांची सोबीत कार्यावळ जाली आनी रातचेच गोंयां येवंक भायर सरले. केन्ना परततलों तें पयलीं थारावंक नाशिल्ल्यान रेल्वे बुकींक करूंक नासलें. थारायलें, हालीं तेंपार मंगळुरच्यान गोंया बस प्रवास केलो ना. देखून बस स्टॅण्डार गेलों. थंय वतकूच कळ्ळें आतां मंगळुरच्यान गोंया वचूंक रातच्यो बशी नात. कर्नाटक एसटी ची वॅबसायट तर रातची णव ते साडे इकरा मेरेन बशी आसात म्हणपाचें सांगता आनी स्टॅण्डार गेल्यार थंय सांगतात बस सकाळची साडे आठांक वता. मागीर एकूय बस ना. स्टॅण्डा भायर कांय खाजगी बशीचीं ऑफिसां आसात. तांकां विचारल्यार तांच्यो बशी फूल. तरी एकल्यान म्हणलें अंकोला मेरेन वचात. थंय बेंगळुरच्यान येवपी बशी मेळूं येतात. मेळटलीच हाची खात्री नासली.
परत स्टॅण्डार आयलों आनी थंयच्या कंट्रोलरा कडेन वासपूस केली. ताणें एक वेगळो पर्याय दिलो. गदग बस सुटपाची आसली. तातूंत बसून होन्नावर वचपाचें. होन्नावरच्यान कारवार, मडगांव गाडी मेळटलीच. हालींसराक अशे देंवत देंवत प्रवास करूंक नासलो. पळोवया तरी म्हणून बसींत चडलों. दोन वरांचेर बस होन्नावर पावली. स्टॅण्डार जायते लोक आसले, बशीय आसल्यो. एसटी चें ऑफीस उगतें आसलें. कंट्रोलरान सांगलें मात्शे रावात बस येवची जाली. बस आयली कंट्रोलरान कंडक्टराक सांगलें कारवार वचचे पॅसेंजर आसा तांकां कारवार मेरेन व्हर. कंडक्टर सोदीत आमी बशिल्ले थंय आयलो. आमी बसींत चडले आनी बस सुरू जाली. कुमठा, अंकोला करीत बस मुखार वताली. कर्नाटकांत रस्ते सामके चकचकीत आनी रूंद बरे जाल्यात. पॅसेंजरांक मातूय मार बसना. सगळे स्टॉप करुनूय वेळार आपल्या मुक्कामार पावता.
कारवार पावले तेन्ना सकाळचीं चार वरां जाल्लीं. बस बस स्टॅण्डार वतली म्हणल्यार पुराय स्टॅण्ड गोरवांनी भरिल्लो. कंडक्टराक सकयल देंवन पयलीं गोरवांक उठोवचीं पडलीं. बस स्टॅण्डार देंवले तर पांय घालूंक जागो ना. सगळ्याक एक तर गोरवां वा शेण. स्टॅण्डा भायल्या रस्त्याचेरूय हीच दशा. मदींच कांय पाडकां शिंगाक शींग लावन कोण बळिश्ट तें पळेतालीं. आनी कुशीक आशिल्ले गाडी वा स्कुटरीक आपटतालीं. गोरवां म्हणल्यार आमचें गोधन. गिरेस्तकाय ही पूण रातभर ती अशींच वाटेर सोडपाची? आमच्या गोंयांत म्हणून कितें वेगळें चित्र दिसना. गोवंश गोवंश म्हणून बोवाळ घालपाचो आनी तांकां रस्त्यार सोडपाचीं. स्टॅण्डा भायर एक गाडो उगतो आसलो जंय च्या मेळटाली. खूबशे लोक थंय च्या घेताले. सगळे खंय तरी वचपाचे. आमीय च्या घेतली आनी गोंयाक वचपाचे गाडयेची वासपूस केली. बसी साडेपांचांक सुट्टल्यो म्हणपाचें कळ्ळें. आतां देडवर ह्या शेणाचो वास घेत बसपाचें आसलें.
कारवारचो बस स्टॅण्ड पळोवंक सोबीत दिसता पूण जायतशी जतनाय घेतिल्ली दिसना. जायते लोक सकाळ फुडें स्टॅण्डार आशिल्ले. पूण थंय आशिल्ल्या बांकड्यार बसनासतना शेजारचे बिल्डिंगेच्या व्हारांदार बशिल्ले. कांय जाण आड पडिल्ले. स्टॅण्डार कांय बशी उब्यो आसल्यो. दोन कदंबाय आसल्यो आनी तांचे चालक-वाहक टॉपार न्हिदिल्ले. आमी येतना होन्नावर, अंकोला बस स्टॅण्डाचेर एसटी चीं ऑफिसां उगतीं आसलीं. कंट्रोलर आपलें काम करताले. पूण कारवाराक कोणूच दिसलो ना. ज्या बस स्टॅण्डार रातदीस येरादारी आसता तेन्ना थंय कंट्रोलर आसप गरजेचें. खंयची बस येता खंयची बस वता हें पॅसेंजरांक कळोवप गरजेचें आसता. कितेंय म्हायती जाय तर ती कोणे दिवपाची? स्टॅण्डा भायर आशिल्ल्या गाडेकाराचोच सगळ्यांक आधार.
ह्या बस स्टॅण्डार कोणाकूय सैमीक कामाक वचपाचें आसल्यार तांणी कितें करपाचें? टॉयलेट आसले पूण ते बंद. तेंकुनूच आशिल्ल्या आड्यार कांय बोर्ड आसले. कानडीन बरयिल्ल्यान वाचूंक जमलें ना पूण भायर मुतल्यार दंड पडटलो म्हणपाची सुचोवणी आसूं येता. भायर मुतप ना आनी टॉयलेट बंद. कितें करपाचें सांगात? खरें म्हणल्यार हांगा एखादो रेस्ट रूम आसप गरजेचें. जे कोण रातच्या वेळार पावतात तांकां तांची बस येसर मात्शे बसूंक वा आड पडपाक मेळूंक जाय. बायलां, भुरगीं हांचे खातीर तर सामकें गरजेचें. ते भायर रातचे रावन सकाळीं स्टॅण्डा वयल्यान सुटपी बस ड्रायव्हर आनी कंडक्टरांक तर चड गरजेचें. रातभर तांणी बसीच्या टॉपार न्हिदप, रातभर जळारांक तोंड दिवप आनी सकाळीं उठून बस घेवन वचप हें सारकें? मात्सो मनीसपणाचे नदरेन विचार करूंक नाका? आज सरकार रस्त्यांचेर जायतो दुडू खर्च करता. बरे रस्ते तशेच बरे बस स्टॅण्ड आसप गरजेचें. बस स्टॅण्डार गरजेच्यो गजाली आसूंक जाय. रातदीस जंय येरादारी आसता थंय पियेवपाचें उदक ते रेस्ट रुमाची सोय करूंक जाय. जाय तर पॅसेंजरा कडल्यान ते सेवेचें मोल वसूल करून घेवं येता.
पांच वरांचेर शिमोगाच्यान एक कदंबा आयली. जायते लोक देंवले. थोडे दुसरे बसीचे प्रतिक्षेंत रावले तर कांय जाण टॉयलेट सोदूंक धांवले. दर एका बस स्टॅण्डार टॉयलेट गरजेचो रे सायबांनो. ताका कुलप मारून जावचें ना. असल्या जाग्यांचेर चोविसूय वरां तो उगतो आसूंक जाय. गांव, शार, राज्य नितळ दवरतले तर हें गरजेचें. नासल्यार भारत स्वच्छ कसो उरपाचो? निरुपाय जाता आनी लोक आशिकुशीक वतात. बसींत सीट आशिल्ले. कारवार एक वर कशें तरी गेल्लें. शिमोगाचे बसीन उपकार केल्ले नासल्यार आनीक अर्दवर सुटका नासली. बस सुरू जाली आनी साडेपांच जाता म्हणल्यार मडगांवां पावले. हांगा शिगमो चालूच आशिल्लो आनी म्युनिसिपालटी कडले रस्ते आडावल्ले. धांव धांव धांवलों आनी तारी कडेन पावलों अशी आमची गत जाल्ली.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
