भांगरभूंय | प्रतिनिधी
कारवार : कारवार जिल्ह्यांत मंगळारा सकाळीं व्हड पालसणां कोसळपाची दुसरी घडणूक घडली. दोनूय घडणुकांनी ९ परस चड जाणांक मरण आयिल्ल्याचो अदमास उक्तायला. सध्या सात जाणांच्यो कुडी सांपडल्यात. हातूंत एकाच कुटुंबांतल्या ५ जाणांचो आसपाव आसा.
गोकर्णच्या दुब्बनसरी दर्यादेगेर लक्ष्मण नायक (४७), ताची घरकान्न शांती नायक (३६), पूत रोशन (११) हांचे सयत एका अनवळखी मनशाची कूड सांपडल्या. पालसणां सयत हीं सगळीं जाणां गंगावळी न्हंयेंत बुडलीं आनी थंयच्यान गोकर्णा व्हांवून गेल्ल्यान थंय तांच्यो कुडी सांपडल्यो. लक्ष्मण नायक हांची धूव अवंतिका (६), सोयरे उपेंद्र (५०) हांचे सयत एका चालकाची कूड घडणुके सुवातेर मातयेंत सांपडल्या. एनडीआरएफ आनी उजो पालोवपी दळाच्या जवानांनी परत सकाळ सावन रेस्क्यू ऑपरेशन सुरू केलां.
१६ जाण जखमी: टँकर चालक अजूनय बेपत्ता
घडणुके सुवातेर लायिल्लो टँकर पालसणां सयत मातये वांगडा गंगावळी न्हंयेंत गेलो. हो टँकर न्हंयेंतल्यान व्हांवतना दिसलो. थंय लागींच आनीक एक च्याचें दुकान आशिल्लें. थंयच्यान सन्नू हनुमंत गौड ही बायल बेपत्ता आसा. तशेंच हीं पालसणां कोसळिल्ल्यान १६ परस चड जाणां जखमी जाल्यांत. तांचेर अंकोला उपचार सुरु आसात. बेपत्ता बायले सयत ट्रक तशेंच गाडयेंत आशिल्ले चार जाण बेपत्ता आशिल्ल्याचें सांगतात.
५० मिटर दोंगर कोसळ्ळो
ही घडणूक मंगळारा सकाळीं ८.५० वरांचेर घडली. पावसाक लागून हांगच्या ५० मिटर परस चड दोंगराचो भाग फाटोफाट कोसळ्ळो. हे कोसळिल्ले मातये पोंदा म्हामार्गाचो १५० मिटर भाग गेला. थंय आशिल्लें हॉटेल आनी बायलेचें च्याचें दुकान मातयेंत १० मिटर पोंदा आसा.
ह्या अपघातांत मरण आयिल्ल्यांच्या कुटुंबाक सरकार ५ लाख रुपयांची भरपाय दितले, अशी घोशणा महसूल मंत्री कृष्ण भैरे गौड हांणी केली. तशेंच राष्ट्रीय म्हामार्ग प्राधिकरणाच्या अधिकार्यांची बसका घेवन चर्चा करतले अशें गौड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
