भांगरभूंय | प्रतिनिधी
कारवार: दांडेली म्हालांतल्या बर्ची रान वाठारांत हात-पांय कापिल्ले अवस्थेंत वागाची कूड सांपडली. जाल्यार जोयडा म्हालांतल्या जगलबेट वाठारांत फांसांत आडकूनन बिबट्याक मरण आयिल्ल्यान एकूच खवदळ पडलो. फाटल्या दोन दिसांत ही दोन प्रकरणां सुमार 15 किलोमिटर अंतराचेर घडिल्ल्यान अनवळख्यां आड गुन्यांव दाखल केला.
दांडेली म्हालांतल्या बर्ची रान वाठारांतल्या नानाकिशोर्डा गांवा कुशीक तकली आनी चारूय पांय कापिल्ले अवस्थेंत दादलो वागाची कूड सांपडली. ताका लागून अनवळख्यान पांय आनी तकली कापून व्हेली आसुये असो दुबाव रानां अधिकाऱ्यांनी उक्तायला. वागाच्या मृत्यू प्रकरणांंत व्याघ्र संरक्षण प्राधिकरण आनी रानजीव अधिनेमाच्या निर्देशा प्रमाण अनवळख्यां आड गुन्यांव दाखल केला.
वयले घडणुकेचे सुवाते सावन सुमार 15 ते 20 किलोमिटर अंतराचेर जगलबेट हांगा बर्ची, दांडेली बायपास रस्त्या कुशीक बिबट्याची कूड सांपडली. ताची शवचिकित्सा केली तेन्ना गळ्याक फांस लागिल्ल्यान ताका मरण आयिल्ल्याचें स्पश्ट जालें. ते खातीर कासा खातीर लायिल्ल्या फांसांत बिबटो सांपडिल्ल्यान ताका मरण आयलां आसुये आनी पुरावे नश्ट करपा खातीर रस्त्याचे कुशीक रानांत व्हरून ताका उडयला आसुये असो दुबाव रानां अधिकाऱ्यांनी उक्तायला. रान विभाग, वास घेवपी सुणीं आनी ठसे तज्ञांचे मजतीन तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
