भांगरभूंय | प्रतिनिधी
चोडणकार : मडगांव वेस्टर्न बायपास सुरु करपाची मागणी
मडगांव : न्यायालयाची देखरेख आशिल्ल्याचें कारण दिवन पर्यावरण पुरक गजालीं कडेन आडनदर करून वेस्टर्न बायपास पुराय जाला. मात, आतां केंद्रीय रस्ते येरादारी आनी महामार्ग मंत्रालयाच्या मंत्र्यांक वेळ नाशिल्ल्यान ह्या मार्गाच्या उक्तावणाक कळाव करतात. कारणा बगर कळाव करप हो न्यायालयाचो अपमान न्हय?, असो प्रस्न काँग्रेस फुडारी गिरीश चोडणकार हांणी केला.
मडगांव वेस्टर्न बायपासचें ११.९ किमी अंतराचें काम आतां पुराय जावपाक पावलां. केंद्रीय मंत्री नितीन गडकरी हांचे हाजेरींत १९ डिसेंबराक ह्या महामार्गाचें उक्तावण जातलें अशी शक्यताय उक्तायताले. ते प्रमाण उरिल्ल्या कामांकूय वेग दिल्लो. मात, वेस्टर्न बायपास पुराय जाले उपरांतूय उक्तावण करिना आनी महामार्ग बंद करुन दवरिल्ल्यान कॉंग्रेस फुडारी गिरीश चोडणकार हांणी टिका केल्या. चोडणकार हांणी, सुरावली ते बाणावली मेरेनचो वेस्टर्न बायपास मार्ग जायते दीस जाले पुराय जाला. मात केंद्रीय रस्ते येरादारी आनी महामार्ग मंत्रालयाच्या मंत्र्यांच्यो तारखो मेळनाशिल्ल्यान ह्या रस्त्याच्या शुभारंभाक कळाव जाता. मात, ह्याच मंत्रालया कडल्यान न्यायालयाची वेस्टर्न बायपासच्या कामांचेर देखरेख आशिल्ल्याचें कारण दिवन पर्यावरणीय गजाली आनी निर्माण जावपी हुंवाराचे परिस्थिती कडेन आडनदर करून प्रकल्प करपाची घाइ केल्ली. मात आतां कसलेंच कारण नासतना, मार्गा पुराय जाला तरी ताचेर बॅरिकेटस दवरून तो बंद करून दवरप आनी शुभारंभ करप ना हो न्यायालयाचो अपमान जायना व्हय? असो प्रस्न चोडणकार हांणी केला.
राज्यांत सध्या पर्यटनाचो हंगाम सुरु आसा. विवीध देशी-विदेशी पर्यटक राज्यांत दाखल जाल्यात. अशा वेळार रस्ते सुरक्षिततायेचो विचार करुन मडगांव वेस्टर्न बायपास सुरु जावपाची गरज आशिल्ली. हाका लागून येरादारी कोयंडीचे प्रकार उणे जावपाचे. मात सरकाराचे अकार्यक्षमतेक लागून आजूनय हो म्हामार्ग पुराय जावन लेगीत येरादारी खातीर बंद दवरला. न्यायालयाचे आदेश पाळून महामार्गाचो शुभारंभ करचो, अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
