भांगरभूंय | प्रतिनिधी
मॅरीकेटी फूडसचो कंसेंट टू ऑपरेट परवानो रद्द करपी आदेश स्थगीत
पणजी : कारणां दाखयात नोटीस धाडिनासतना संगीताच्या आवाजाची मर्यादा वाडयली म्हणून कंसेंट टू ऑपरेट परवानो रद्द करपाचो आदेश गैर आशिल्ल्याचो उल्लेख करून प्रशासकीय लवादान हणजूणच्या मेसर्स मॅरीकेटी फूडस प्रायव्हेट लिमिटेड आस्थापनाचो परवाना रद्द करपाच्या आदेशाक स्थगिती दिल्या. प्रदूशण नियंत्रण मंडळान १६ डिसेंबराक कंसेंट टू ऑपरेट परवानो रद्द करपी आदेश दिल्लो.
ह्या आदेशाक मेसर्स मॅरीकेटी फूड्सान प्रशासकीय लवादांत आव्हान दिल्लें. प्रशासकीय लवादाचे अध्यक्ष व्दिजपल पाटकार हांणी आदेशाक स्थगिती दिल्या. सध्या नातलांचो हंगाम आशिल्ल्यान आस्थापन बंद दवरल्यार याचिकादाराक बरेंच लुकसाण जातलें, अशेंय आदेशांत म्हणलां.
गोंय प्रदूशण नियंत्रण मंडळाच्या चे फाटभूंयेर याचिकादार मेसर्स मॅरीकेटी फूडसान ऑनलायन आवाजाचें मोजमाप करपी यंत्रणां बसयल्यांत. ७ डिसेंबर आनी ८ डिसेंबर हे दोन दीस आवाजाचें प्रमाण वाडलें. तशेंच याचिकादारान परवानगी घेनासतना उक्ते सुवातेर संगीत वाजयलें. ह्या नेमभंगाक लागून कंसेंट टू ऑपरेट परवानो द्द केलो. हे कारवाये खातीर नोटीसूय धाडूंक ना. ही कारवाय गैरवाजवी स्वरूपाची आसा. प्रतिवादी प्रदूशण नियंत्रण मंडळान ह्यान पयलीं ४ नोव्हेंबर दिसा नोटीस जारी केल्ली. हे नोटीसीचे फाटभूंयेर २६ नोव्हेंबर दिसा घडणुके सुवातेर वचून पळोवणी केल्ली. कंसेंट टू ऑपरेट परवानो रद्द करपाची कारवाय ह्या दिसा केल्ले पळोवणेक लागून जावंक ना हें स्पश्ट आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
