भांगरभूंय | प्रतिनिधी
गोंयांत घरांचे फायदे दिवपाक आनी अनधिकृत बांदकामांचें नियमितीकरण करपाक सरकार कायदे, येवजण्यांचेर काम करीत आसा. तातूंत सद्याचें घर कायदेशीर करपा खातीर ‘म्हजें घर’ येवजण आनी फुडाराक बेकायदेशीर बांदकाम जावचें न्हय हे खातीर नवे कायदे हांचो आस्पाव जाता. पूण भौस अर्ज करपाक फॉर्माची वाट पळयता. ते खंय मेळटात तें जाणून घेवपा खातीर हांवें आरटीआय स्रोता कडेन एका खात्याक ऑनलायन अर्ज केलो, अधिकाऱ्यान हुशारेन जाप दिली, अर्ज स्पश्ट ना. देखून खात्याक भेट दी. खरें म्हणल्यार अर्ज फॉर्म लोकां मेरेन पावोवपाच्या हेतान हांवें ही आरटीआय केल्ली. पूण म्हाका अशी जाप मेळ्ळी. आरटीआय अधिकाऱ्याक हॅट्स ऑफ!
सद्याच्या अनधिकृत बांदकामांचें नियमितीकरण ही गरीबां खातीर एक मुळावी कायद्याची येवजण आसा, जी दडपशाय केल्ल्या लोकांच्या आलाशिऱ्याची राखण करतली. हे येवजणेचो हेत योग्य परवानगी नासतना बांदिल्ल्या सद्याच्या 50 हजारां परस चड (?) घरांक नियमित करपाचो आसा.
खूब वाट पळोवपी कायदो म्हळ्यार कोमुनिदाद आनी सरकारी जमनींचेर घरां नियमित करप. सरकारान येवजण सोंपी करून सामान्य मनशाक मजत करची. विधानसभेन हालीं संमत केल्ल्या विधेयकांत घरां सयत कोमुनिदाद आनी सरकारी जमनीचेर कांय अनधिकृत बांदकाम नियमित करपाचो हेतू आसा.
1972 पयलीं अस्तित्वांत आशिल्लीं लाखां परस चड घरां कायदेशीर करपाचो विचार सरकार करता, तातूंत आदल्या नेमांतलीं अस्पश्टताय काडून संबंदीत सरकारी अधिकाऱ्यांक संबंदीत परिपत्रकां जारी केल्यांत. पूण कायदेशीर प्रक्रिया अशी आसपाक जाय की लोकांक “सरकार तुमच्या दारांत आसा” अशें दिसूंक जाय.
फुडाराक बेकायदेशीर बांदकाम जावचें न्हय हे खातीर नवे कायदे हाडप हें सरकाराचें बरें पावल. हे खातीर 25 चौखण मिटर वाठारांत लेगीत घरां बांदपा खातीर कायदो आसपाक जाय.
फुडाराक बेकायदेशीर बांदकाम आडावपा खातीर कायदो हाडपाची येवजण मुख्यमंत्र्यान जाहीर केल्या, कारण ताका लागून बेकायदेशीर बांदकाम कामां बंद जातली आनी सरकार मोडप सारकिल्ल्या कृतींतल्यान मुक्त जातलें.
गोवा हाउसिंग बोर्ड वेगवेगळ्या उत्पन्न गटां खातीर हावसिंग प्रकल्प दिता, पूण पयशांचे म्हत्व आनी खरे गरजेवंत गोंय हाउसिंग बोर्डाच्या फायद्या पासून वंचित उरतात. देखून बेघर लोकांची चवकशी नोंदींत आसपाक जाय, जाका लागून तांकां फायदो मेळटलो.
मुखेल मुद्दो म्हणल्यार सद्याचे अनधिकृत बांदकाम कायदेशीर करपाक आनी फुडल्या बेकायदेशीर बांदकामांक आडावपा खातीर सरकार सक्रीयपणान वावुरता हें तोखणायेचें, पूण सरकारान स्वेच्छेनूच कायदेशीर प्रक्रिया थारायिल्ले स्वरूपांत लोकांक सुलभ करपाक जाय. कारण सरकार लोकां खातीर.
घरांची गरज भागोवपाक आनी वेगवेगळ्या वर्गांक अर्थीक मजत दिवपाक वेगवेगळ्यो येवजण्यो आनी कायदे आसात. पूण जागृतायेचो उणाव आसा वा पात्रतायेंत लूपहोल आसात.
दरेक येवजण वा कायद्या खातीर विशिश्ट पात्रताय निकश आनी अर्ज करपाची प्रक्रिया हांची जाणविकाय रहिवाशांनी आसपाक जाय, हें बरोबर, पूण ह्यो येवजण्यो कोण चालीक लायतलो? आनी सरकारा वतीन ह्यो उपेगी कायदेशीर येवजण्यो लोकांक स्वेच्छेनूच कोण मेळोवन दितलो? येवजण्यां विशीं लोकांक जाणविकाय आसपाक जाय. कोणाचें कर्तव्य?
डॉ. आंबेडकर हांचें ‘देशसेवे’चें अध्यात्म
‘आध्यात्मिकता’ ही संकल्पना खंयच्याच एका मनशान बरयल्ली ना, कारण ती आत्म्याचो आनी दैवी आनी जिणे पद्दतीचो अभ्यास करपाचो विशय. एकुणिसाव्या आनी विसाव्या शेंकड्यांत अध्यात्माचे आर्विल्ले विचार विकसीत जाले अशें म्हण्टात, तातूंतल्यान अस्तंती गूढ परंपरा आनी आशियाई धर्मांचो प्रभाव दिसून येता. अध्यात्म हो एक व्हड विशय. ताचेर जायत्या संत, तत्वगिन्यानी, समाजसुदारकांनी बरयलां, जशें ज्ञानेश्वरी हो संत ज्ञानेश्वरान बरयिल्लो एक आध्यात्मिक ग्रंथ.
अध्यात्म म्हणल्यार कितें? तत्वगिन्यानीं कडेन जायत्यो जापो आसूं येतात, पूण साद्या उतरांनी ‘अधी’ (शरीर) आनी ‘आत्मन’ (आत्मो) हांचे पसून ‘आध्यात्मिकता’ हें उतर तयार जालां. अध्यात्म म्हणल्यार स्वताचो अभ्यास आनी जिणेचो खरो आनंद मेळप.(?) आध्यात्मिक लेखन कोणे बरयलें ह्या प्रस्नाक जायत्यो जापो मेळूं येतात, कारण अध्यात्म हो खंयच्याय एका मनशान बरयल्लो विशय न्हय, पूण जायत्या विचारसरणींच्या लोकांनी ताचेर बरयलां.
पुर्विल्ल्या काळांत संत ज्ञानेश्वरान भगवदगीतेचेर ज्ञानेश्वरी हें पुस्तक रचलें, तातूंत आध्यात्मिक विचारांची खोलायेन विस्कटावणी आसा. एकुणिसाव्या आनी विसाव्या शेंकड्यांत अस्तंती गूढवाद, भारतीय धर्म आनी तत्वगिन्यान हांचे पसून अध्यात्माच्यो नवे संकल्पना विकसीत जाल्यो, नवे साधक, पंडितांची निर्मिती जाली. अध्यात्म ही जियेवपाची कला. तिचो आयज धंदोयबी जाला.
जायत्या संतांनी, तत्वगिन्यानींनी ह्या विशयाचेर विचार मांडल्यांत. खरें म्हणल्यार अध्यात्मांत प्रवीण जावपी लोकांच्या मनांत विचारांचें पीक जल्माक येता. पूण समाजाक उबारपी खरो आध्यात्मिक मनीस वा व्यक्ती…. जाका समाज गुरूची पदवी दिता.
थोडयाच उतरांनी सांगपाचें जाल्यार अध्यात्म हो विचारांचो एक व्यापक आनी सतत विकसीत जावपी प्रवाह, जो एकाच मनशान बरयल्लो ना. अध्यात्म हो एक विशय जाचो गुणाकार जाता. विचारांचो गुणाकार. समाजाक उबारपी होच खरो आध्यात्मिक गुरू आसूंक जाय. डाॅ. आंबेडकर हांणी भगवान बुद्धाच्या आध्यात्मिक विचारांतल्यान देशाची सेवा केली. ही खरी आध्यात्मिक बाब.
राजेश बाणावलीकार,
वेगसवाडो, हडफडे -नागवा, बार्देश,
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
