भांगरभूंय | प्रतिनिधी
संविधानांत नागरिकांचे कांय हक्क सांगल्यात, पूण ते सगल्यांक खबर आसात, अशें ना. मागीर ते पाळपाची गजाल सोडात. दरेक नागरिकान कायदो चुकनासतना पाळपाक जाय, अशें म्हणलां. नेमके थंयच आमी घाणयतात. चुकून वा मुद्दाम कायदो मोडटात. मुद्दाम बेकायदेशीर कामां करतात, तांकां कायद्यांत खंय तरी चोरवाट वा पळवाट आसतली, हें ताका खबर आसता. ताचे परस म्हत्वाची (काय गंभीर?) गजाल म्हणल्यार हांवें कितेंय केल्यार म्हजो ‘आका’ (धनी, पात्रांव) म्हाका वाटायतलो, हाची ताका 200 टक्के खात्री आसता. मजा म्हणल्यार तो ताका यमाच्या दारांतल्यान परत हाडटाय बी! हे आका कोण ताची फोडनिशी करपाची गरज ना. अरेबियन नायट्स काणयांनी चिराग (दिवो) घासलो काय जीन भायर येतालो आनी ‘क्या हुक्म है मेरे आका’, म्हणीत काम करतालो. ताचे बदल्यात तो कांय घेनाशिल्लो. मात, आधुनीक जिनांक लागून अल्लाउद्दीन, अलिबाबांचें फावलां. कितेंय केल्यार सुट्टलो अशें दिशिल्ल्यान कायदो माड्डुपाची वृत्ती वाडल्या. ताचे आड खर पावलां उखलपाक जाय. नाजाल्यार तें एक दीस राज्याक मारक थारूं येता.
गोंय हें पर्यटन राज्य. हांकां दर्यावेळो, देगांचेर सरबराय वेवसाय चलतात. तातूंतलो एक शॅक. हाचो मूळ अर्थ ल्हानशी खोंप, जी केन्नाय काडपाक मेळटा. दुसरो अर्थ मोगिके वांगडा लग्न करिनासतना रावतात तो जागो. गोंयांत शॅक म्हणल्यार एकाच जाग्यार आशिल्लें उक्तें हाॅटेल. गोंयांत शेंकड्यांनी शॅकां आसात. पर्यटन खात्यान दर्यावेळांचेर गोंयकार वेवसायिकांक शॅकां वांटून दिल्यांत. थंय देशी- विदेशी पर्यटक येवन खातात, जेवतात. भायर घाल्ल्या खाशेल्या खाटींचेर वत खातात. हे शॅक तशे लोकप्रीय. गुन्यांवाच्यो खबरो वाचप्यांक तर तांची इल्ली चडूच वळख आसतली. अर्थांत कायदो पाळिनाशिल्ले थोडेच शॅककार आसतले. सगल्यांक एकाच मापान मेजप तांचेर अन्याय करपी थारतलें. हीं शॅकां कायदेशीर मार्गान विकत घेवन थोड्यांनी बेकायदेशीर मार्गान दुसऱ्यांक चलोवपाक दिल्यांत. तांचेर कारवाय करपाचो निर्णय पर्यटन खात्यान घेतला. 110 शॅकांक नोटीस काडिल्ली. तातूंतलीं 23 शॅकां दुसऱ्यांक चलोवपाक दिल्यांत अशें दिसून आयलां. भितरल्लीं 6 परप्रांतीयांनी भाड्याक घेतल्यांत. तीं मोडपाची मोहीम खात्यान हातांत घेतल्या.
आपूण शॅक चलोवपाक घेवन तें दुसऱ्याक भाड्यान दिवप हो शॅक धोरणाचो भंग, अशें खातें म्हणटा. आतां आमी कारवाय करतले. पूण फुडाराक गोंयकारांनी गोंयकार शॅक भाड्यान दिल्यार तें बेकायदेशीर थारना, असो बदल सरकारान आपल्या धोरणांत केल्यार हो प्रस्न सुटावो जातलो, अशें पर्यटन खात्याक दिसता. ते वटेन अखील गोंय शॅक संघटणेचे अध्यक्ष म्हणटात, गोंयचो खंयचोय वेवसाय चडांत चड गोंयकारांच्या हातांत आसचो, अशें सरकाराचें धोरण आसा. तातूंत शॅक वेवसायूय येता. म्हणटकच आमी तीं गोंयकारांकूच चलोवपाक दिवन हो वेवसाय गोंयकारां कडेनूच दवरला. लाॅटरी पद्दतीन शॅकांचें वांटप जाता. परंपरीक शॅककारांक तीं मेळूंक नात. आतां तेच तीं भाड्यान घेवन चलयतात. तातूंत एकलो जाण्टो आसा. ताकाय शॅक मेळूंक ना. हे पिरायेचेर ताका त्रास जावचे न्हय, म्हूण मनीसपणाचे भावनेंतल्यान आमी ताका एक शॅक भाड्यान चलोवपाक दिला. आतां हातूंत तथ्य आसा काय ना, तें पर्यटक खात्याक बेस बरें खबर आसतलें. हें सत्य आसतलें. कारण आदलो अणभव आसले बगर कोण शॅक चलोवपाक घेवचो ना. पूण, अशे शॅक भाड्यान दिवप योग्य काय अयोग्य हो वादाचो विशय.
खंयचोय पालिका, पंचायत बाजार वचून पळयात. दुकानांचे, स्टाॅलांचे, कियोस्कांचे धनी एक, भाड्यान घेवन चलोवपी दुसरोच. कितलिंशींच उदाहरणां आसतलीं. थोडे कडेन तर दुसऱ्यान तो घेवन तिसऱ्याकूच दिला. फाल्यां खांपो वेवसायीक 20 दुकानां घेतलो आनी आपल्याक जाय तांकां तीं चलोवपाक दितलो. अशें केल्ल्यान दुसऱ्यांचेर तो अन्याय थारचो ना? शॅकांचें वांटप लाॅटरी पद्दतीन जाता म्हणटकच एकल्याकूच चड शॅकां घेवपाक मेळचीनात, पूण हेर मळा वयल्या वेवसायिकांचें कितें? सरकारान हो प्रकारूच मुळा पसून ना जातलो, हे खातीर यत्न करचे. शॅक गोंयकारांनीच घेवचे, अशें सरकार आनी शॅकधनी संघटणेकूय दिसता. पूण, थंय गोंयचें खाशेलपणूय दिसपाक जाय. मागीर ती सजावट आसूं, भितर काम करपी लोक आसूं वा जेवण, खाण. ह्या शॅकांनी हे बाबतींत गोंयकारपण दिसता? हांगा पर्यटक आनी शॅक कामगारां मदीं बरे संबंद निर्माण जातले, हे खातीरूय यत्न जाय. कारण अदीं मदीं किजिलां जातात. मागीर मारामारी. पर्यावरण, आवाज- लायटीचें प्रदुशण हाचे कडेन तर शॅकधनी संघटणेचें चड लक्ष जाय. सरकारी यंत्रणांनीय ते बाबतींत नदर दवरची. नाजाल्यार कायदो पांयां पोंदा चिड्डुपाचें धाडस मेळटा तो करीत रावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
