भांगरभूंय | प्रतिनिधी
पणजीः नांव आनी आडनांव बदलपाक मान्यताय दिवपाचो अधिकार दिले नोंदणी रजिस्ट्रार कडल्यान कनिश्ट वर्ग दिवाणी न्यायाधीशांक दिले उपरांत लेगीत नांव आनी आडनांव बदलपाचें प्रकार चालूच आसा. कायद्यांत बदल जाले उपरांत लेगीत नांव आनी आडनांव बदलपाचें प्रमाण पयलीं सारकेंच आसा. नांव बदलपा खातीर म्हयन्याक 8 ते 10 अर्ज येतात अशी म्हायती रजिस्ट्रार (सीवील रजिस्ट्रार) कार्यालयांतल्यान मेळ्ळी.
होंडा – सत्तरीच्या सय्यद साहिल नांवाच्या मनशान आपलें नांव साहिल मांद्रेकार अशें बदलपा खातीर दिवचलच्या कनिश्ट वर्ग न्यायालयांत अर्ज केला. प्रतिज्ञापत्र आनी गरजेची औपचारिकताय पुराय केले उपरांत कनिश्ट वर्ग दिवाणी न्यायाधीशान हरकतीं खातीर नोटीस जारी केल्या. अर्जदारान 13 जानेवारी 2026 दिसा अर्ज केले उपरांत न्यायालयान 23 जानेवारी 2026 दिसा हरकत सादर करपाची नोटीस जारी केल्या. अर्जदाराचें नांव बदलपाक कोणाकय हरकत आसल्यार ताका 30 दिसां भितर म्हणल्यार 23 फेब्रुवारी 2026 मेरेन सादर करचे पडटले. कोणाचीच हरकत नासल्यार कायद्या प्रमाण ताचें नांव बदलतले.
जायते बिगर गोंयकार, जायतीं वर्सां गोंयांत रावून आपलें नांव बदलपाक धडपड करतात. आडनांव बदलून आपूण रावतात त्या गांवाचें नांव आडनावांत बदलपाची तांची प्रवृत्ती आसता. हे विशीं विधानसभेंतूय चर्चा जाल्या. हाका लागून जावपी गैरवेव्हारांचेर आळाबंदा हाडपा खातीर सरकारान 2022 वर्सा कायद्यांत दुरुस्ती केली. नांव वा आडनांव बदलपाक मान्यताय दिवपाचो अधिकार नोंदणी रजिस्ट्रारांक दिवचे परस कनिश्ट वर्ग न्यायाधीशांक दिलो. कनिश्ट वर्ग न्यायालयान मान्यताय दिले नोंदणी कार्यालयांत नांव बदलपाची प्रक्रिया जाता. कायद्यांत दुरुस्ती जाले उपरांत लेगीत राज्यांत नांव वा आडनांव बदलपाचें प्रमाण उणें जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
