भांगरभूंय | प्रतिनिधी
म्हापशें: दर्यादेग वाठारांत अनैतीक धंद्याचो प्रसार आनी पर्यटकांची लुबाडणूक करपी दलाल (टावट्स) उण्यांत उणी 15 दिसांची बंदखणीची ख्यास्त जावंक जाय. हे विशीं कायद्यांत सुदारणा करपा खातीर आपूण मुख्यमंत्री आनी अॅडव्होकेट जनरला कडेन उलोवणीं करतलों अशी म्हायती आमदार मायकल लोबो हांणी दिली.
कळंगूटे डॉल्फीन सर्कल ते सेंट अँथनी कपेल मजगतच्या रस्त्याच्या हॉटमिक्सींग कामाचो शुभारंभ केले उपरांत लोबो पत्रकारां कडेन उलयताले.
गोंयच्या पर्यटन मळार दलालांची संख्या वाडत आसा. हाचेर पुलीस आनी पंचायतीन नियंत्रण दवरूंक जाय. तशेंच प्रभाग पंच, समविचारी लोक आनी समाजीक संघटणांची हाचे कडेन नदर आसूंक जाय. हाचे पयलीं कळंगूट पुलिसांनी ह्या दलालांक अटक करपा खातीर मोहीम राबयिल्ली अशें लोबोन म्हणलें.
दलालांक लागून दर्यादेग वाठारांत अनैतीक वेव्हार चलतात. ताका लागून तांकां अटक करून 24 वरां पुलीस कोठयेंत दवरपाक जाय आनी उपरांत उपजिल्होधिकाऱ्या वतीन तांची सुटका जातकूच अशेच तरेच्या दोन गुन्यांवांनी तांकां अटक जायत जाल्यार उण्यांत उणीं 15 दिसांची ख्यास्त जावंक जाय आनी कायद्यांत तशी तरतूद करूंक जाय अशें मत लोबोन उक्तायलें.
हे लोक पत्रकां आनी फोटो दाखोवन पर्यटकांची फटवणूक करतात. तांकां मारपेट करून लुबाडणूक करतात. ताका लागून पर्यटक वायट अणभव घेवन परतून वतात आनी गोंयची बदनामी जाता. दलाल हे अनैतीक धंद्यांक प्रोत्साहन दितात. हाका लागून हो प्रकार कायमचो बंद जावंक जाय अशें लोबोन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
