भांगरभूंय | प्रतिनिधी
अमीत पालेकारः मुख्यमंत्री डॉ. प्रमोद सावंत हांणी गृह मंत्री पद सोडपाची मागणी
भांगरभूंय । प्रतिनिधी
पणजीः गोंयांत दर दिसा घडपी गुन्यांवांचें प्रमाण पळयत जाल्यार कायदो आनी सुवेवस्था सांबाळपाक सरकार अपेशी थारलां, हें सिद्ध जालां. कुडचड्यार बिरेस्तारा जाल्ल्या फारपेट प्रकरणा वयल्यान आम आदमी पक्षाचे गोंय प्रदेशाध्यक्ष ॲड. अमीत पालेकार हांणी मुख्यमंत्री डॉ. प्रमोद सावंत आनी कायदो सुवेवस्था मंत्री निलेश काब्राल हांचेर फोग काडलो.
आपाच्या कार्यालयांत घेतिल्ले पत्रकार परिशदेंत पालेकार उलयताले. तांच्या वांगडा पक्षाचे उपाध्यक्ष वाल्मिकी नायक हाजीर आशिल्ले.
फाटल्या कांय दिसां सावन गोंयांत दीसपट्टे गुन्यांव घडत आसात. लोकांचे सुरक्षेचो प्रस्न साणीर आयला. स्वता मुख्यमंत्र्या कडेन गृह खातें आसा. गोंयांतल्यो गुन्यांवकारी कारवायो आळाबंदा हाडपाक ते अपेशी थारल्यात. ताका लागून तांणी गृह मंत्रीपद सोडचें, अशी मागणी ॲड. पालेकार हांणी केली.
सोनाली फोगट खून प्रकरण, मांडवी पुलाचेर अपघातांत मरण आयिल्ल्या तरणाट्याच्या आवय बापायचो ताचो घातपात जाल्ल्याचो आरोप, सिद्धी नायक प्रकरणांत आरोपीक सोदपांत अपेस अशा साबार प्रकरणांचो उल्लेख करीत तांणी गोंयची बदनामी जाता, अशें सांगलें. राजकी मनशांच्या हस्तक्षेपाक लागून चडशीं प्रकरणां चिड्डून दवरतात, असो आरोप तांणी केलो. तशेंच कार्यक्षम पुलीस अधिकाऱ्यांक मुख्यालयांत वा प्रशिक्षण केंद्रांत धाडिल्ल्याचें तांणी सांगलें.
कांय प्रकरणांनी गोंय पुलिसांनी फक्त माध्यमांच्या चेपणाक लागून वा कुटुंबीक चेपणाक लागून गुन्यांव दाखल केल्यात. मांडवी पुलाचेर जाल्ल्या अपघात प्रकरणांत मोटार चालकाक अजून अटक कित्याक करूंक ना? हें पुलिसांचें पर्यायान सरकाराचें अपेश आसा, असो थोमणो उपाध्यक्ष नायक हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
