भांगरभूंय | प्रतिनिधी
6 नोव्हेंबराक संसदीय समितीची फुडलीं बसका
नवी दिल्ली, खबरां संस्था ः सध्याच्या भारतीय दंड संहिता (आयपीसी), फौजदारी प्रक्रिया संहिता (सीआरपीसी) आनी पुरावो कायदो बदलपाच्या विधेयकाचेर अहवालाचो मसुदो शुक्रारा थारायिल्ले प्रमाण स्वीकारुंक ना. विधेयकाचेर अभ्यास करपाक आनीक वेळ जाय अशें सांगून दोन वांगड्यांनी पत्रां बरयलीं. हें मतींत घेवन विधेयकांची चवकशी करपी संसदेचे स्थायी समितीन ही बसका फुडें धुकलल्या.
‘आयपीसी’, ‘सीआरपीसी’ आनी ‘पुरावो कायदो’ बदलुन तांचे सुवातेर ‘भारतीय न्याय संहिता’, ‘भारतीय नागरी सुरक्षा संहिता’ आनी ‘भारतीय पुरावो विधेयक’ घालपाचो प्रस्ताव आसा. संबंदीत विधेयकांची गृह मंत्रालयाच्या स्थायी समिती मुखार चवकशी सुरू आसा आनी 27 ऑक्टोबराक तांचो अहवाल मसुदो मान्य करपाचो आसा अशी म्हायती समितीच्या वांगड्यांक दिल्ली. पूण आदले केंद्रीय गृहमंत्री पी चिदम्बरम आनी तृणमूल काँग्रेसीचे डेरेक ओब्रायन हांणी समितीचो अध्यक्ष ब्रिज लाल हांका बरयल्ल्या पत्रांतल्यान समितीचो काळ वाडोवपाची मागणी केल्या. तात्पुरत्या वेंचणुकेच्या फायद्या खातीर कश्या कशेंय विधेयक मांडचे न्हय असो उल्लेख तांणी समितीच्या अध्यक्षाक बरयल्ल्या पत्रांत केल्लो.
समाजांतल्या कुशीक काडिल्ल्या घटकांक फायदो जावपाचो हेतू आशिल्ले घटमूट कायदे करपा खातीर निमाणो अहवाल समितीन बेगोबेग मान्य करचो न्हय. तशें जालें जाल्यार विधीमंडळान केल्ल्या तपासणी प्रक्रियेची फकांडां जातलीं असो आक्षेप विरोधी पक्षान केल्लो. हे समितींत 30 वांगडी आसून तातूंतले 16 वांगडी सत्ताधारी भाजपाचे आनी उरिल्ले 14 विरोधी पक्षाचे आसात. पूण, समितीन व्हड सल्लो घेतला आनी तीन म्हयन्यां भितर अहवाल मान्य जातलो असो दावो भाजप करता. समितीची फुडली बसका 6 नोव्हेंबराक जातली आनी त्याच दिसा अहवालाचो मसुदो मान्य जावपाची शक्यताय आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
