भांगरभूंय | प्रतिनिधी
हालींच्या दिसांनी मडगांवचें कायदो शिक्षण दिवपी महाविद्यालय गाजता. वेवसायीक पदवी मेळपाक हें शिक्षण उपेगी पडटा. गोंयांत हांचे पयलीं फक्त मिरामार वाठारान आशिल्लें साळगांवकार महाविद्यालय कायदो शिक्षण दितालें. आतां मडगांवचें कारे काॅलेजूय हें शिक्षण दिता. हाका लागून दक्षीणेतल्या विद्यार्थ्यांक बरी तजवीज जाल्या. जशी वैजकी शिक्षण घेवपाक ‘नीट’ सारकी देश पातळेवेली परिक्षा दिवची पडटा तशी हें शिक्षण घेवपाक परिक्षा नासली तरी थळावी प्रवेश परिक्षा दिवची पडटा. साळगांवकार आनी कारे कॉलेज ही परिक्षा एकठांय घेतात. हातून विद्यार्थ्यांचो कल लक्षांत येता. आयज काल घराघरांनी वाद आसात. घोव- बायलांचें पटना म्हूण घटस्फोट, विनयभंग, बलात्कार खून, बोगस नांवांनी जागे विकप अशे जायते प्रस्न उप्रासल्यात. हें सगलें कोर्टान व्हरून सिद्द जावंचे आसता. ताचे खातीर आमकां कायद्यांतल्या तज्ञांचो आदार घेवचो पडटा. आयज देशा भितरलीं झगडीं, वाद विवाद, दरोडे, खून, मारामाऱ्यो पळयत तर ह्या फाट्याक मरण ना अशें दिसता.
ह्या फाट्यान खंयचोय विद्यार्थी येवं शकता, पूण ताका प्रवेश परिक्षा ही दिवचीच पडटा. ‘गोवा क्लेट’ अशे हे परिक्षेचें संक्षीप्त नांव म्हळ्यार कॉमन कायदो ऍडमिशन परिक्षा. ती 8 जुनाक जाल्ली, हें तुमकां खबर आसतलें. लागीं लागीं 182 विद्यार्थी तिका बशिल्ले. आतां तांकां परतून ते परिक्षेची तयारी करची पडटली का तांकां प्रवेश दितले हें आजून थारुंक ना. प्रकरण कोर्टान वतलें असो अदमास आसा. हे परिक्षेन तुमकां कायद्याच्या शिक्षणा बद्दल खरीच आवड आसा? थोडेंतरी गिन्यान आसा? हें पारखितात. कायद्याचें शिक्षण सगळ्यांक जाय, पूण सगलेच तें करूंक पावतात, अशें ना. जे हें शिक्षण घेवपाक वतात तांकां ही परिक्षा दिवची पडटा. हालींच केल्ल्या एका सर्वेक्षणांत जाहीर जालां की, बंगळुरूचे राष्ट्रीय कायदो इंडिया विद्यापीठ, पश्चिम बंगाल राष्ट्रीय विद्यापीठ, भोपाळ तशेच गांधीनगर हांगां सल्ले कायदो विद्यापीठ, मुंबयचें सरकारी कायदो विद्यापीठ, महाराष्ट्र राष्ट्रीय कायदो विद्यापीठ, देवी अहिल्या विश्व विद्यालय इंदोर हीं देशांतली व्हडलीं म्हाविद्यालयां. तांची लेगीत प्रवेश परिक्षा आसता. बारावे उपरांत पांच वर्साचो कोर्स, पदवीधारकांक तीन वर्साचो कोर्स, पदव्युत्तर जाल्यांक एल एल एम कोर्स, हे खेरीज डॉक्टरेट करपाची सोय गोंयांनूच आसा. तशेंच सर्टिफिकेट कोर्स लेगीत आसा. ही चवकशी करात आनी मागीरूच प्रवेशाचो विचार नक्की करात.
ह्या फाट्यान कायद्याचो अभ्यास तर करचो पडटाच, पूण जशी केस येता तसो अभ्यास करपाची आपली तयारी जाय. तुमचें स्वताचें ग्रंथालय आसूंक जाय. वाद विवाद करपाकूय अभ्यास करचो पडटा. तुमचें गिन्यान, खेरीज तुमचे मुद्दे कशे आसात? ते तुमी कशे मांडटात हांचेर केशीचो फुडार आसता. एखादो वकील चड फी कित्याक घेता? तर ज्ञाना वांगडा योग्य वेळार वाद विवाद करपाची ताची पद्धत महत्वाची आसता. ह्या फाट्यान तुमची भास जशी महत्वाची, तशें कायद्याचें गिन्यान, समयसूचकता, समरणशक्ती लेगीत महत्वाची थारता. व्हड- व्हड केशी तुमचे कडेन ह्या गुणां खातीर येवं शकतात. हाचे खातीर व्हड अणभवी वकिला कडेन तुमी शिक्षण घेवप महत्वाचें.
बरो वकील कोण? अशे जर एखाद्यान विचारलें तर जाप मेळटली की जो केशी जिखून दिता तो. आपली फी कोण घेना, घेतली तर उणीं धरता अशो जापो लोकांक अपेक्षित नासता, तांका जाय आसता निकाल. किदेंय आसूं जर तुमकां ह्या फाट्यान यश मेळोवपाक जाय तर शाळे सावनूच तयारी करप गरजेचें. तुमची लागीच्या तशेंच संवसारांतल्या म्हत्वाच्या घडामोडींचेर नजर जाय. हाका लागून दिसाळीं, म्हयन्याळीं वाचप गरजेचें. तुमची भास बरी आसपाक जाय. तिचेर तुमचें प्रभुत्व आसूंक जाय. शाळे भितर जावपी बऱ्योच कार्यावळी आसतात. तातूंन प्रत्यक्ष वांटो घेवपाक जाय, वादविवाद सर्त ही ह्या फाट्यांक म्हत्वाची आसता, वक्तृत्व सर्तीन वांटेकार जावपाक जाय. बारावी जाले उपरांत लेगीत आतां पदवी अभ्यासक्रमांक तुमकां प्रवेश मेळटा.
सगळी म्हायती संकेतथळांचेर मेळटा. तरी लेगीत तुमी कायदो शिक्षण दिवपी संस्थेक शक्य आसा जाल्यार प्रत्यक्ष भेट दिवपाक जाय. साळगांवकार कायदा कॉलेजीचें संकेतस्थळ आसा https://vmslaw.edu.in/ तर कारे कॉलेजीचें संकेतस्थळ आसा https://www.grkarelaw.edu.in/ . हांका जरूर भेट दियात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
