भांगरभूंय | प्रतिनिधी
कायदो बागवता तसो बागोवपाक जाय जाल्यार तुमी खूब गिरेस्त आसपाक जाय नाजाल्यार देशांतले सगल्यांत म्हारग वकील हाडपाची तुमची तांक जाय. खरें तर सगलें कायद्याच्या पुस्तकांत दिल्लें आसता. तरी कांय जाणाक क्लांयट रावतात. तर थोडे फक्त टायमपास करीत आसतात. हो फरक कित्याक आसता, कित्याक लागून हें घडटा, हाचो विचार करून तुमी कायदो फांट्यांत वचपाक शकतात. तुमकां चड उलोवपाची तांक आसत, कायद्याची आवड आसत, उतरांचेर शेक आसत, मुद्देसूद वाद घालपाक आवडटा आसत, जाल्यार तुमी कायद्याचे विद्यार्थी जावपाक योग्य आसात, अशें म्हणू येता. गोंयांत कायद्याचें शिकप दिवपी दोन काॅलेजी आसात. एक पणजेचें साळगांवकार कायदो म्हाविद्यालय दुसरें मडगांवचें कारे म्हाविद्यालय. पणजे मिरामारचें काॅलेज हें सगल्यांत पोरणें. हांगां प्रवेश मेळोवपाक तुमकां राष्ट्रीय पांवड्या वयली कायद्याची परीक्षा पास जावची पडटाच, पूण त्या- त्या म्हाविद्यालयचीय परीक्षा पास जावची पडटा. आॅनलायन पसून आतां कायद्याचें शिकप मेळपाक लागलां.
ह्या दोनूय म्हाविद्यालयाच्यो वेबसायटी आसात. त्यो तुमी बारीकसाणेन पळोवन घेवं शकतात. युक्तीवाद, खंयचे कायदे खंय लागतात, ताची म्हायती, सतत अभ्यास करपाची तयारी, तुमचे भाशेचेर शेक आसल्यार तुमी कायदो फाट्यांत वचात. तुमकां ह्यो वेबसायटी पळोवन थोडी तरी कल्पना येतली. आयज तुमकां एके कायदो अकादमीची म्हायती दितां. 2012 ती सुरू जाल्ली. ती इंडियन लिगल फावंडेशनाचो भाग. ही अकादमी आॅनलायन कोर्स शिकयता. तुमच्या कायद्याच्या शिक्षणाक पुरक असो हो अभ्यासक्रम. देखीक सायबर कायदे बदलत आसतात. तुमी हे अकादमींत तांचो आॅनलायन कोर्स करपाक शकतात. तांचे खूब कोर्स आसात, ते तुमी आॅनलायन करपाक शकतात. एक प्रकाराची तुमी केल्ली गुंतवणूक. कायद्याच्या फांट्यांत बदल जायत आसतात, हे सगल्यांनी मतींत दवरूंक जाय. नाजाल्यार तुमकां एखादी केश लढपाक कठीण वचूं येता. कोर्सा भायर ही अकादमी व्याख्यानां, चर्चासत्रां घेता. कार्यशाळा आयोजीत करता. हें फक्त तुमचें गिन्यान वाडपाक. तांचो प्लेसमेंट सेलूय आसा. ताचे वरवीं ते तुमकां कोणाक नोकरेची, कामाची गरज आसा ते पळयतात. तुमकां खंय नोकरी आसा जाल्यार तेंय कळयतात. तांचे कडेन सरकारी आनी खाजगीय लोक आसात. तेन्ना वकील जावपाक सोदपी आनी वकील आशिल्ल्यांनी हे https://ialm.academy/contact-us ही वेबसायट पळोवची आयएएलएम अकादमीचे 3-4 फांटे आसात.
ट्रॅकिंग शिबीर
कसलेंय शिक्षण घेतलें तरी आपली भलायकी सांबाळपाक जाय. व्यायाम हो ताचो सोंपो उपाय. पूण सैमाच्या गोपांत भोंवडी करप, म्हणल्यार ट्रॅकिंग हें सामकें गरजेचें. तुमकां ट्रॅकिंगांत वांटेकार जावपाची संद आसा. सैमाचेर भाशणां आयकप, व्हिडियो पळोवप, पुस्तकां वाचप गरजेचेंच, पूण प्रत्यक्ष सैमाचो अणभव घेवप सगल्यांत चड बरी गजाल.
येता त्या 26 ते 29 डिसेंबर मेरेन खोतीगांव- काणकोणा ट्रॅकिंग आयोजीत केलां. हातूंत तुमकां सुकणीं पळोवपाची संद मेळटली. साबार तरांच्यो वनस्पतीय दिसतल्यो. साहस अकादमी, सांखळी वतीन गोंय राज्य खेळां फाट्याच्या पालवान हें ट्रॅकिंग जातलें. तुमकां हातूंत वांटेकार जावपाचे आसा, जाल्यार प्रज्योत साखळकार (9422446776), उदय सावंत (94230 62492) वा देवेंद्र गुरव (94224 45538) हांचे कडेन संपर्क करचो. वांगडा वैजकी प्रमाणपत्र दिवप गरजेचें. हें तुमकां 22 डिसेंबर मेरेन करपाक जाय. जाय जाल्यार तुमी तांचे कडेन उलोवन अधिक म्हायती, मनांतले दुबाव पयस करपाक शकतात.
विज्ञानाची कार्यावळ
विज्ञान फांट्याच्या विद्यार्थ्यांनी 18 डिसेंबराक जाल्ली कार्यावळ चुकोवंक नासतली. तातूंत व्हडले विज्ञानीक गोंयकारांचे भेटेक आयिल्ले. मुखेल कार्यावळ एनआयओ दोनापावला जाल्ली. तातूंत नामनेचे विज्ञानीक, गोंयचे पूत अनिल काकोडकार आशिल्ले. तशेंच इस्रोचे आदले अध्यक्ष एस किरणकुमार, गोंयचे विज्ञानीक डाॅ. विठ्ठल तिळवे आनी हेर जायते मुखेल विज्ञानीक आशिल्ले. उत्तर गोंय आनी दक्षीण गोयांतल्या मुखेल म्हाविद्यालयांनी ह्यो कार्यावळी जाल्यो. विद्यार्थ्यांक एक बरी संद मेळ्ळी. तुमकां खबर आसतलेच की गोंयचे आदले मुख्यमंत्री भोवमानेस्त मनोहर पर्रीकार हांचे जयंती निमतान ही कार्यावळ जाली. ती तांणीच फुडाकार घेवन सुरू केल्ली. विज्ञानाची तांकां खूब आवड आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
