भांगरभूंय | प्रतिनिधी
भारतीय क्रिकेटींत IPL – Indian Premier League – नांवाचें वस्तादपण जाता. हांव तें पळयना म्हणल्यार जाता. कांय वर्सां पयलीं पळयतालों. म्हजे खातीर क्रिकेट हो एक वाजेवणो खेळ. अंदूंच्या मोसमांतली फायनल मॅच अहमदाबादच्या मोटेरा (आतां मोदी) स्टेडियमार जाली. विराट कोहलीच्या RCB – Royal Challengers Bengaluru – हाणें Punjab King’s XI ह्या पंगडाक फकत स (6) धांवड्यांनी हारयलो. हो खेळ 3 जूनाक रातचो जालो आनी कोणाक कांय विचारी सवरिनासतना फाल्यां, म्हणजे 4 जूनाक, बेंगळुरूंत आमी जैताचो सुवाळो मनयतले अशें कोहलीन जाहीर केलें.
मजा अशी की कोण्णाक, खंयचेच अधिकारिणीक, विचारिनासतना अचकीत केल्ली ही घोशणा देशाक बरीच घातक थारली. मॅची उपरांत इनामां वांटपाचो सुवाळो 0110 वरांचेर सोंपलो. रातोरात बेंगळुरूंत मजामस्ती सुरू जाली ती फांतोडेर चार वरां मेरेन चल्ली. लोकां बाराबर पुलिसांकूय जागरण जालें. 2009, 2011 आनी 2016 ह्या वर्सांक RCB कोपाक स्पर्श करतां करतां तें तांचे कडल्यान निसटिल्लें. IPLचें T-20 वस्तादपण 2008 वर्सा सुरू जाल्लें, पूण 18 वर्सां उपरांत हें कोप RCB पंगडान पयले फावटीं हातासलें. RCBचे क्रीस गेल, एबी द विलिये आनी विराट कोहली हे खडेगांठ गडे. लोकांनी समाज माध्यमांचेर कोहलीक meme (कावल्योबावल्यो) करून ‘च्याचें कोप’ म्हणून बी भगल्यो मारिल्ल्यो. कोहलीन फाटलीं णव वर्सां कॅप्टन म्हणून वावुरतना आठ वर्सां सगल्यांत चड धांवड्यो काडल्यात. ताच्या 8000 धांवड्यांनी आठ शेंकडे आनी 63 अर्दशेंकडे आसपावतात.
IPLची फाटभूंय : सगले गडे पावणे वरवीं वेंचतात. पंगडांचे धनी बोली 10 लाखां वयल्यान सुरू करताले ती आतां 30 लाखांचेर पावल्या. (अर्थांत, हो एक सट्टो कसो). ऋषभ पंत हो लखनौ सुपर जायण्टसांचो गडो 27 कोटींचे बोलयेचेर सा जाला. फाटोफाट श्रेयस अय्यर हो 26.75 कोटींचेर.. हें जालें खेळा विशीं.
चार जूनाक कर्नाटकांतल्या केम्पेगौडा विमानतळ ते ताज वॅस्ट एण्ड होटॅला मेरेनच्या 34 किमि मार्गारूय लोकांनी दोंशीं गरदी केल्ली. ताजा कडल्यान विधानसौदाच्या सोंपणांचेर (लागीं – देड किमि – म्हणून) गरदी आशिल्लीच. थंय गड्यांचो मुख्यमंत्री सिद्धरामय्या आनी उपमुख्यमंत्री डिके शिवकुमार हांणी भौमान केलो. उपरांत सगली गरदी एम चिन्नास्वामी स्टेडियमार गेली पूण धाच मिणटांनी सगलो उत्सव सोंपलो. कारण, भितर सरतना 33,000 लोकांची चिड्डाचिड्डी जावन इकरा (11) जाण मेले आनी 50 जाणांक दुखापत जाली. स्टार स्पोर्ट्सान आपलें प्रक्षेपण थांबयलें.
स्टेडियमा भायर फकत दोन रुग्णवाहिका (आंबुलांसी) आशिल्ल्यो. कसलींच मार्गदर्शक तत्वां (SOP) नाशिल्लीं. पूर्ण बेशिस्त, गोंदळ, कोंफुजांव आनी अंदाधुंदी. मेल्ल्यांच्या घरच्यांक पाचारूंक वा दुखापत जाल्ल्यांचे खबरेक मात एकलोय गेलो ना – गडो वा मंत्री!
ज्युस्त 1984तले भोपाळ वाय दुर्घटणे वेळा वयली याद जाली. त्या Union Carbideच्या एण्डरसनाचें कितें जालें कोण्णाक खबर ना! आमच्या दोळ्यांचेर दुडवांची साय कशी आनी कित्याक येता?! आमचे खेळगडे (चड करून क्रिकेटीचे), राजकी पक्षांचे फुडारी आनी चलचित्रांचे नट, नटयो हे तुजे म्हजे फुडारी न्हय. ते आपलो झेत दाखोवंक सोदतात. पयलीं रेडियो आनी टिव्हीच आशिल्ली. आतां फेसबूक, इन्स्टाग्राम, एक्स, बी असलीं समाज माध्यमां आसात. तांचेर ते आपल्या पयश्यांचो फोर्स दाखोवन तुमकां आमकां खेळोवंक आनी नाचोवंक सोदतात.
खंयूय दुर्घटणा घडटकच सरकार मेल्ल्यांक, दुखापत जाल्ल्यांक नितीक जापसालदारकी म्हणून (ex gratia) दुडवांचो आधार जाहीर करता. सरकारान पयलीं धा लाखांचो आधार जाहीर केलो, पूण उपरांत भौशीक दबावाक लागून 25 लाख दितां म्हणलें. जिवनांत केन्ना 25 हजार पळोवंक नाशिल्ले भिकमागे आमी ही 25 लाखांची भीक घेवन ओग्गी बसतात. भारत देश इतलो विस्तृत आनी हांगा दीसपट्ट्यो घडणुको इतल्यो, सकाळीं घडिल्ले घडणुकेचें म्हत्व दनपारां म्हणीसर आमचे खातीर नाच्च जाता. तशेंच, हीय दुर्घटणा सर्वसाधारण भारतीय विसरलो. आतां अहमदाबादाचे विमान दुर्घटणे वटेन लक्ष लागलां.
ते चिड्डाचिड्डींत एक 13 वर्सांचें भुरगेंय मेलें. म्हणटकच, भारतीय मानसीकताय क्रिकेटीचे कितले आधीन आसा पळयात. क्रिकेटीन लोकाक फकत पिशे करूंक नात जाल्यार आपल्या चपक्यांतूय दवरल्यात ही खंतीची गजाल.
हाचेय परस काळजाक चड पीळ घालपी गजाल म्हणजे प्रज्वल नांवाचो एक तरणाटो आपूण “नोकरेचे मुलाखतीक वतां” अशें बंडल मारून घरच्यान गेल्लो. तो चिड्डल्ल्यान ताची कुडूच घरा पावली. ही आमची अधोगती. ही देशाची tragedy. शोकांतिका. ह्या गजालीं वयल्यान आमी भारतीय कितेंय शिकतले काय सदां भशेन, “एं! एक तरणाटो मेलो? मूय मेली मरे!” अशें म्हणून ओग्गी बसतले? आनी सदां भशेन अचळय विसरतले?
DNA Entertainment हे कम्पनीचो Marketing मुखेली निखील सोसालिया हाका कोर्टान चवदा (14) दिसांची कच्ची कैद (remand) दिल्या. चवकशेंतल्यान कितेंय निश्पन्न जायत काय तो सदां भशेन सोंपेपणीं सुट्टलो? बाणस्तारच्या अपघाताची ओगीच यादशी आयली. हेर कम्पनीं बाराबर सोऱ्याच्यो कम्पनी क्रिकेटीचें प्रायोजन करतात. खंय सोरो, खंय क्रिकेट? काय, गडेय बेबदे?
Liverpool नांवाचो फुटबॉल पंगड इंग्लंडाक लोकांरुचीचो. पूण तो जिखत जाल्यार इंग्लंडाक केन्नाच चिड्डाचिड्डी जाल्ल्याचें आयकूंक ना. हो आमचे आनी तांचे मानसीकतायेंतलो फरक! हे फावटीं सरकारी यंत्रणा (पुलीस बी) संख्येन उणी पडली काय कितें तेंय चवकशेंतल्यान भायर येवपाची गरज आसा.
RCBक 70-80 कोटी रुपयांचें प्रायोजन Diageo हे ब्रिटीश कम्पनी कडल्यान, म्हणजे तिचे United Spirits हे subsidiary वा सहाय्यक कम्पनी कडल्यान मेळटा. तेन्ना भोपाळचे केशींत अमेरिकी एण्डरसन सुटलो. हे फावटीं ब्रिटीश कम्पनीचो CEO सुट्टलो?
मेल्ल्या गरिबांक न्याय कोण दितलो? पयशे तुमी खूब दिशात गा! पूण मनीस परतो हाडूंक मेळत? खंयच्याय कॅप्टनाच्यान फाल्यां उत्सव मनयतले म्हणून अचकीत घोशणा करूं येता? अशें इंग्लंड-अमेरिकेक जाता? मागीर, भारतांतूच हें पिशेपण कित्याक घडटा? कोहली म्हजो दुस्मान न्हय, पूण ताचे असल्यांचेर कारवाय जावपाचें आमच्या कायद्यांत कांयच्च ना!
म्हणजेच कायदो गाढव आनी आमी मोनीं-भेरीं गोरवां. कश्शींय आमडात!!
दामोदर घाणेकार
84599 98914
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
