भांगरभूंय | प्रतिनिधी
पणजीः राज्य तज्ञ मूल्यांकन समितीन गोंयांत कायदेशीर रेंव काडपाक मान्यताय दिल्या आनी फुडल्या सप्तकांत जावपी पर्यावरण परिणाम मूल्यांकन प्राधिकरणाचे बसकेंत हो प्रस्ताव येतलो. अधिकृत मान्यताय मेळ्ळे उपरांत कायदेशीर रेंव काडपा खातीर परवाने दिवपाची प्रक्रिया खण खात्या कडल्यान सुरू जातली अशें सुत्रांनी सांगलें.
खण खात्यान मांडवी, जुवारी आनी हेर न्हंयांतले 14 झोन कायदेशीर रितीन रेंव काडपा खातीर निश्चीत केल्यात. कांय दिसां आदीं पर्यावरण परिणाम मूल्यांकन प्राधिकरणान ह्या सगल्या 14 झोनांची तपासणी केल्ली. ते उपरांत कांय दिसां आदीं जाल्ले राज्य तज्ञ मूल्यांकन समितीचे बसकेंत ह्या 14 झोनांतल्यान रेंव काडपाक मान्यताय मेळ्ळ्या. आतां हो प्रस्ताव फुडल्या सप्तकांत पर्यावरण परिणाम मुल्यांकन प्राधिकरणाचे बसके मुखार येतलो. प्राधिकरणा कडल्यान मान्यताय मेळ्ळ्या उपरांत खण खातें रोखडीच रेंव काडपा खातीर परवाने दिवपाची प्रक्रिया सुरू करतले अशेंय सुत्रांनी सांगलें.
मजगतीं, राज्यांतल्या न्हंयांतल्यान रेंव काडपाचेर न्यायालयान बंदी घाल्ल्यान गोंयकारांक रेंव मेळोवपा खातीर शेजारच्या राज्यांचेर आदारून रावचें पडलें. हाका लागून रेंवेचें दर वाडलें. थळाव्या लोकांक ताचो व्हड धपको बसलो. हाका लागून गोंयांत बेकायदेशीर रेंव काडपाचो उद्देग सुरू जालो. हे विशीं थळावे लोक अस्वस्थ जाले उपरांत राज्यांत रेंव काडपाक कायदेशीर मान्यताय दिवपाचो यत्न सरकारान सुरू केल्लो. तशेंच खण खात्यान हे विशीं सगळ्यो कार्यपद्दती पुराय केल्ल्यो. पूण राज्यांत पर्यावरण संबंदीत प्रकल्प आनी हेर गजालींक परवानगी दिवपाची गरज आशिल्ली. पर्यावरणीय परिणाम मूल्यांकन प्राधिकरण नाशिल्ल्यान फुडली प्रक्रिया थांबली. निमाणें कांय दिसां आदीं केंद्र सरकारान डॉ. पुरुषोत्तम पेडणेकार हांच्या अध्यक्षते खाला तीन वांगड्यांची प्राधिकरणाची थापणूक जाली. ते भायर प्राधिकरणाक मजत करपा खातीर 9 वांगड्यांची तज्ञ मूल्यांकन समितीय स्थापन केल्ली. ते उपरांत सरकारान ही प्रक्रिया नेटान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
