‘कायदेशीर’ घुसखोरी

भांगरभूंय | प्रतिनिधी

पोट भरपा खातीर खंयच्याय देशांत वतलो जाल्यार कायदेशीर मार्गान वचपाक जाय. परवाने, दाखलेय खरे जाय. मात, भारतांत घुसपी कांय विदेशी नागरीक बोगस कागदांच्या आदारान हांगा येतात. तीं तांकां थंय करून मेळटात आनी हांगाय मेळटात. हालींच एका राष्ट्रीय दिसाळ्यान एक खबर उजवाडायल्या. फक्त 20 हजार रुपया दिल्यार आधारकार्ड तयार करून दितात. निवासी प्रमाणपत्रूय मेळटा. तेंय बी हुबेहुब. बेकायदेशीर पद्दतीन आसलें, तरी कर्मचाऱ्यांच्या हातार कितें दवरून बोगस पत्तो दिवन दाखले, कार्डां पसून तयार करूं येतात. एका स्टिंग आॅपरेशनांत एजंट सांगता, आमी पांच हजारां परस चड आधारकार्डां तयार केल्यांत. तीं घेवपी विदेशी नागरीक. नोकरे खातीर ते हांगा आयल्यात. पूण भितर आतंकवादी, गुन्यांवकार आसल्यार तो आमच्या देशा खातीर धोको न्हय? हातूंत विवीध कार्डां, प्रमाणपत्रां घेवप्यां परस तो दिवप्यांक चड दोशी धरचे पडटले. पूण तांचेर कितें कारवाय जाता? त्या देशा आड दिखावू आंदोलन करपा परस प्रत्यक्ष कृती जाय. तीय बी सरकारी यंत्रणांची. भारतांत खऱ्या सारकेंच दिसपी आधारकार्ड बाळगुप्यां मदीं बांगलादेशी नागरीक चड आसात, अशें दिसून आयलां.
हें पयलेंच खेप उक्तडार आयलां, अशें न्हय. कारण बांगलादेशांतल्या बऱ्याच नागरिकांक मुंबय, लखनौ, रांची, कोलकातांत धरल्यात. तांचे कडेन बोगस प्रमाणपत्रां मेळ्ळ्यांत. उदरगत जावंक ना, उद्देग, वेवसाय वाडूंक ना, शिक्षणाची सुविधा ना जाल्यार बरेच तरणाटे फुडारा खातीर स्थलांतर करतात. आमच्या गोंयांत पसून लाखा वयर स्थलांतरीत आसतले. तातूंत परदेशी नागरिकूय आसूं येतात. फाटीं दोगां बांगलादेशींक धरिल्ले. देशांतल्या विकसीत राज्यांनी, म्हानगरांनी हजारांनी स्थलांतरीत नोकरी, वेवसाय, धंदे करतात. ते भारतीय नागरीक. मात विदेशी नागरिकूय थंय वळख लिपोवन रावतात. वयर उल्लेख केला, ते सुखवस्तू विदेशी. म्हणजे 20- 25 हजार एजंटाक दिवपाची ऐपत आशिल्ले. बोगस प्रमाणपत्रां घेवन ते वर्साचीं वर्सां रावतात. सध्या भारतांत अडेज कोटीं वयर घुसखोर रावतात. हो फक्त अदमास. कारण हातूंतल्या कांय जाणां कडेन कायदेशीर प्रमाणपत्र, कागदां आसतलीं. तीं कशीं मेळोवपाचीं तें सगल्यांक खबर आसा. कांय जाणांनी नांवां, आडनांवांय बदल्ल्यांत आसतलीं. तपास यंत्रणां तांकां धरतात, मायदेशांत धाडटात. पूण ते परत येतात.
शिमेर कडक बंदोबस्त आसता. कांय कडेन तो ना तें पळोवन थोडे घुसतात. डिजिटल पद्दतीन तांकां आयडी, बँक लिंक, विवीध सरकारी कागदां तयार करून मेळटात. अर्थांत घरच्या भेदीं बगर हें शक्यूच ना. हे खातीर समाजान जागृत रावपाक जाय. आशिकुशीक दुबावीत हालचाली दिसल्यो, बोगस कार्डां केल्यांत असो दुबाव आयल्यार पुलिसांक कळोवपाक जाय. मात, पुराव्या बगर दावे नाकात. 20 हजारांत आधारकार्ड ही आमचे खातीर लजेची गजाल. हें कार्ड करपाची प्रक्रिया आनीक कडक जावप गरजेचें. तें करून दिवपी बोगस एजंटांचेरूय नदर जाय. सांपडले जाल्यार कडक कारवाय. आंगठो, सय, फोटो, कार्डांची म्हायती आॅनलायन आसप गरजेचें. देशभरांतल्या तपासयंत्रणां कडेन ती आसची. आमच्यो शिमो सुरक्षीत आसच्यो. ते खातीर अत्याधुनीक उपकरणां वापरूं येतात. बेकायदेशीर रितीन देशांत रावपी ह्या विदेशी नागरिकांचो राजकी पक्ष मतां खातीर गैरफायदो घेवपाक शकतात. दुसऱ्या राज्यांतल्यान आयिल्ल्या मतदारांचो पसून वापर पक्ष करतात. शिमेचेर घाळ रावल्यार घुसखोर येतलेच. काश्मीरा सारक्या प्रदेशांत जाल्यार आतंकवादीय घुसतात. ताका लागून आमकां कितें व्हगडावचें पडलां, तें सगल्यांक खबरूच आसा. तेन्ना घुसखोरी ही देशाचे बुन्यादीचेर हल्लो करता, हें मतींत दवरून ती आडावपाक सगल्यांनीच यत्न करचे. आयज तो वेळ आयला.