भांगरभूंय | प्रतिनिधी
म्हापशें, प्रतिनिधी ः मायना, पाटो कामुर्ले व्हिली डिकुन्हा हांच्या घरांक उजो लागून सुमार सुमार 2 लाखांचें लुकसाण जालें. म्हापशें उजो पालोवपी दळाच्या कर्मचाऱ्यांनी वेळार उज्याचेर नियंत्रण हाडिल्ल्यान व्हड दुर्घटना टळली. सुक्या तणाक लागिल्लो उजो घरा मेरेन पावलो.
ही घडणूक सोमारा, 10 तारखेक सकाळीं सुमार 11.40 वरांचेर घडली. ह्या वेळार डिकुन्हा कुटुंब घर बंद करुन भायर सरिल्ले. घरा फाटल्यान उक्त्या मेकळें सुवातेर आशिल्ल्या सुक्या तणाक कोणें तरी उजो लायिल्लो. उश्णतेक लागून उजो पेटून तो घरा मेरेन पावलो. हांतूत कौलारू घराची रांदचीकूड आनी आजून एका कुडींचे लुकसाण जालें. रांदचे कुडींतलो फ्रीज, ओव्हन आनी घरांतल्यो हेर वस्तूं उज्यांत लासून गोबर जाल्यो.
घडणुकेची म्हायती मेळ्ळ्या उपरांत म्हापशें उजो पालोवपी दळाचे हवालदार विष्णु गावस, देवेंद्र नायक, प्रवीण गांवकार, भिकाजी काळोजी आनी लविंदर साळगांवकार हांणी पर्वरी उजो पालोवपी दळाच्या कर्मचाऱ्यांच्या मजतीन उजो नियंत्रणांत हाडून पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
