भांगरभूंय | प्रतिनिधी
म्हापशें ः आजरा-आंबोली मार्गावेल्या सुळेरान वाठारांत जाल्ल्या आपअपघातांत अंकिता अजित भोसले (50, कामुर्ली) हिका मरण आयलें. जाल्यार तिचो घोव अजित हरिश्चंद्र भोसले (56), भुरगीं आशिष (29), अंकेश (31) हीं जखमी जाल्यात. शिर्डी, अक्कलकोट देवदर्शन करुन परत येतना हो अपघात जालो.
मेळिल्ले म्हायती प्रमाण, बुधवारा दनपारां भोसले कुटुंब शिर्डी-अक्कलकोट देवदर्शनाक वचपाक भायर सरिल्लें. बिरेस्तारा देवदर्शन करून सांजेच्या 6 वरांचेर परत येवपाक भायर सरलें. येतना शुक्रारा फांतोडेर सुमार 4 वरांचेर सुळेरान वाठारांत एका ओल्ताचेर ड्रायव्हराचो गाडयेवेलो ताबो सुटलो आनी रस्त्या कुशीक आशिल्ल्या जायरातीच्या एका तकट्याक गाडयेचो नेटाचो धपको बसलो आनी गाडी उमथली.
ह्या अपघातांत अंकिता हांकां जाग्यारुच मरण आयलें. ती मूळ कामुर्लेची, म्हापश्यां नुस्तें विकपाचो वेवसाय करताली, अशें कळटा. जखमींचेर आजरा ग्रामीण हॉस्पिटलांत उपचार चलतात. आजरा पुलिस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
