भांगरभूंय | प्रतिनिधी
अडेज म्हयन्यांत दोन किलोमिटरांचेंय काम ना; थळाव्या लोकांनी उक्तायली नाराजी
भांगरभूंय । जयेश नायक
शिवोलीः फक्त दोन किलोमिटर अंतर भुंयगत वीज केबल घालपाचें काम अडेज म्हयने जाले तरीय पुराय जायना. हे खातीर कामुर्लीच्या लोकांनी खर नाराजी उक्तायल्या.
कामुर्ली आनी खैराट वागाळी वाठारांतली वीज समस्या सुटावी करचे खातीर भुंयगत वीज केबल घालपाचें काम सध्या चालू आसा. पोरेश्वर मंदीर ते खैराटचो वीज ट्रान्सफोर्मर हें अंतर सुमार दोन किलोमिटर आसा. थंयच भुंयगत वीज केबल घालपाचें काम चालू आसा. ह्या कामाची सुरवात मार्चांत सुरू केल्लें. सुरवेक ह्या कामाक कांय आडखळी आयल्यो. ट्रान्सफोर्मर बसोवपाचे सुवातेकूय हरकत घेतिल्ली. उपरांत हे समस्येचेर उपाय काडिल्लो, पूण कंत्राटदारान काम कांसवाचे गतीन केल्ल्यान तें अजून पुराय जावंक ना. पावस खंयच्याय खिणाक सुरू जावपाक शकता. ताका लागून हें काम जाता तितले बेगीन जावपाची गरज आशिल्ली, पूण सध्या तरी तशीं कसलींच चिन्नां दिसनात. अजून खूब कडेन खणपाचें उरलां. खूब कडेन रस्त्याचे कुशीक मातयेच्यो राशी दिसतात. लोकांक आपल्या घरांत वतना लेगीत कसरत करची पडटा. ताका लागून ल्हान सान अपघात चालूच आसात. उदकाचे परंपरीक व्हाळ बंद केल्यात. हे संबंदांत कंत्राटदाराक विनावणी करून लेगीत कसलीच उपाय येवजण केल्ली दिसना. हाका लागून थळाव्या लोकांनी खर नाराजी उक्तायल्या.
भुंयगत वीज केबल घालपाच्या कामाक जाल्लो कळाव पटपा सारको न्हय. आतां मेरेन काम पुराय जावपाक जाय आशिल्लें. आमी हे संबंदांत परतून परतून फाटपुरवण करतात. वीज अभियंते लेगीत वेळावेळार येवन पळोवणी करतात.
मुड्डावाडो खैराट वाठारांत खूब कडेन रस्तो खणिल्ल्यान घातक परिस्थिती निर्माण जाल्या. श्री काळाखडपेश्वर देवळा कडलो व्हाळ पुरयिल्ल्यान पावसाचें उदक खंय वतलें, हो व्हड प्रस्न आसा. चलिल्लें काम पळयत जाल्यार कंत्राटदार ह्या कामाक पात्रूच नाशिल्ल्याचें दिसता.
पंदरा दिसांनी काम पुराय जातलें अशें आस्वासन कंत्राटदारान दिल्लें. हें काम केन्ना सोंपतलें हो सध्या व्हड प्रस्न आसा. दोन तीन दिसांनी पावस येतलो. रस्त्या वयली माती लोकांच्या घरांनी वचपाक शकता. रस्त्या वयले मातयेक लागून अपघातांचीय शक्यताय आसा.
– शरद गाड, आदले सरपंच कामुर्ली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
