भांगरभूंय | प्रतिनिधी
मुख्यमंत्रीः पॉश कायद्या खाला अंतर्गत समिती सक्तीची
भांगरभूंय । प्रतिनिधी
मडगांवः कामाचे सुवातेर लैंगीक छळ आडावपा खातीर पॉश कायद्या खाला सगळ्यो शिक्षणीक संस्था, खाजगी उद्देगीक आस्थापनांत अंतर्गत समिती स्थापन करप सक्तीची आसा. हे संबंदांत मुख्य सचिवां कडेन चर्चा केल्या. ते प्रमाण बेगिनूच हे विशींचे परिपत्रक जारी करतले. बायलां खातीर कामाचे सुवातेर सुरक्षीत वातारवण आसचें, हे खातीर सरकाराचे प्राधान्य आसतले, अशें मुख्यमंत्री डॉ. प्रमोद सावंद हांणी सांगले.
मडगांवां रवीन्द्र भवनांत गोंय राज्य महिला आयोगा वतीन लैंगीक छळ प्रतिबंधक कायदो (पॉश) 2013 विशीं जनजागृती कार्यावळ आयोजीत केल्ली. ह्या वेळार मुख्यमंत्र्या सयत राष्ट्रीय महिला आयोगाची अध्यक्ष विजया रहाटकर, दक्षीण गोंय जिल्होधिकारी इग्ना क्लिटस, दक्षीण गोंय पुलीस अधिक्षक सुनिता सावंत, राज्य महिला आयोगाची अध्यक्ष रंजिता पै हाजीर आशिल्ली.
कामाचे सुवातेर जावपी लैंगीक छळ म्हणल्यार मुळाव्या अधिकाऱांचेर हावळ. समान संद आनी मानवी मुल्यांचें घट्टण लेगीत आसा. ताका लागून कामाचे सुवातेर लैंगीक छळ जावचो न्हय हे खातीर आदराची वागणूक मेळपाची गरज आसा. पॉश कायद्याक लागून बायलांक अत्याचारा पसून सुटका दिवपाचीय वेवस्था केल्या. हो कायदो सगळे कडेन पाळप गरजेचें आसा, अशें रंजिता पै हांणी सांगलें.
बायलांक खूबश्या आव्हानांक फुडो करचो पडटा. लैंगीक छळा संबंदांत एकादी घडणूक सांपडली जाल्यार तत्काळ कारवाय जावपाची गरज आसा, अशें इगना क्लिटीस हांणी सांगलें. फक्त बायलांच्या लैंगीक छळा विशींच्या कागाळींचेर कारवाय करप इतलेंच न्हय जाल्यार ते समितीन बायलां खातीर कामाचे सुवातेर बरें वातावरण आसतलें, हें पळोवपाचीय जापसालदारकी आसा, अशें विजया रहाटकर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
