भांगरभूंय | प्रतिनिधी
युनायटेड फोरम ऑफ बँक संघटणेची मागणी
आझाद मैदानार आंदोलन; 450 परस चड फांट्यांतल्या कर्मचाऱ्यांनी घेतलो वांटो
पणजी: राष्ट्रीयकृत बँकेच्या कर्मचाऱ्यांक दरेक शेनवारा सुटी दिवन कामाचो कालावधी सप्तकांतल्यान पांच दीस करचो अशी मागणी युनायटेड फोरम ऑफ बँक युनियना वतीन केली. हे खातीर मंगळारा विवीध राष्ट्रीयकृत बँक कर्मचाऱ्यांनी एका दिसाचो संप केलो. तशेंच आझाद मैदानार आंदोलन केलें. आंदोलनांत गोंयांतल्या राष्ट्रीयकृत बँकांच्या 450 परस चड फांट्यांतल्या कर्मचाऱ्यांनी वांटो घेतलो.
हे विशीं संघटणेचे मॅक्स परेरा हांणी सांगलें, संपांत चार अधिकारी जाल्यार पांच हेर कर्मचारी संघटणांनी वांटो घेतलो. देशभरांत करतल्या संपाचो हो एक वांटो आशिल्लो. केंद्र आनी राज्य सरकाराचीं खातीं, एलआयसी तशेंच भौशीक मळा वेल्या हेर उपक्रमांक दरेक शेनवारा सुटी दितात. पूण राष्ट्रीयकृत बँकांच्या कर्मचाऱ्यांक म्हयन्यांतलो दुसरो आनी चौथो शेनवार काम करचें पडटा. सुटी दिवपा विशीं आमच्या संघटणांनी हाचे आदीं केंद्र सरकारा कडेन उलोवप केलां.
हाचे पयलीं आमी आमची मागणी भारतीय बँकींग संघटणे वतीन (आयबीए) केंद्र सरकारा मेरेन पावयिल्ली. हाचे उपरांत अधिकारी आनी कामगार संघटणांची आयबीएची उलोवणी जाल्ली. मार्च 2024त आमकां दरेक शेनवारा सुटी दिवपाचें आस्वासन दिल्लें. पूण दोन वर्सां जावन गेलीं तरी ताची अंमलबजावणी जाल्ली ना. हे विशीं आमी विवीध केंद्रीय खात्यां कडेन फाटपुरवण करीत आसात. आमची मागणी जाता तितले बेगीन पुराय करची हे खातीर आमी देशभरांत संपाचें आयोजन केलां.
चाळीस मिणटां अतिरिक्त काम करपाक तयार
आमी दरेक शेनवारा सुटी मागीत आसले तरी ताचे बदला दिसाक 40 मिणटां चड काम करपाची आमची तयारी आसा. हे विशीं आमी लेखी स्वरुपांत आयबीएक कळीत केलां. आमी गिरायकांची गैरसोय करपा खातीर न्हय जाल्यार आमच्या अधिकारां खातीर संपर्क करीत आसात अशें मॅक्स परेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
