भांगरभूंय | प्रतिनिधी
हाचे मुखार भाशणां ठोकून उपकारचीं नात, तर 24 x 7 लोकांचीं कामां करचीं पडटलीं.
पुराय राज्याचें लक्ष लागिल्ल्या पणजे म्हापालिकेचे वेंचणुकेचो निकाल अखेरेक लागलो. 30 मदले 27 जागे थळावे आमदार, येणावळ मंत्री बाबूश मोंसेराताच्या पॅनलाक मेळ्ळे. जाल्यार आदले आमदार, संरक्षण मंत्री स. मनोहर पर्रीकार हांचे पूत उत्पल हांच्या पॅनलाक फक्त 3 जागे. फाटोफाट पांचवे खेपे ही म्हापालिका मोंसेरात हांच्या हातांत उरल्या. म्हापौर आशिल्लो पूत रोहीत हांणी केल्ल्या उदरगतीच्या कामाक लागून आनी भाजपाच्या वावुरप्यांक लागून हें जैत मेळ्ळां, अशें तांणी सांगलें. तर म्हापालिका प्रभाग फेररचणूक, आरक्षण हाका लागून प्रचाराक उणो वेळ मेळ्ळो. आतां लोकांचीं कामां करीत रावन विधानसभा वेंचणुके मेरेन आमची तयारी सुरूच उरतली, अशें उत्पल पर्रीकार हांणी म्हणलां. भाजपाचो मोंसेरात पॅनलाक तर आप, काँग्रेसीचो पर्रीकार पॅनलाक तेंको आशिल्लो. दोनूय वटेन विवीध विचारसरणेचे लोक एकठांय येवन लढले. मोंसेरात आनी पर्रीकार प्रत्यक्ष वेंचणुकेंत देवंक नात. कांय कडेन भोंवून प्रचार केला आसतलो तितलोच. पूण सभा, बसका, बॅनरबाजी, भासाभास जावंक नाशिल्ल्यान ही वेंचणूक कशी दिसलीच ना. आतां सत्ताधारी गटाक पणजी हें देशांतलें एक आदर्श शार करपाक वावुरचें पडटलें.
मोंसेरात पॅनलाचे 30 तले 27 जागे म्हणल्यार मळबा येदें जैत. मात, निकालान पर्रीकार पॅनलान निरशेवपाची तशी गरज ना. कारण तांकां लागीं लागीं 40 टक्के मतां मेळ्ळ्यांत. 10 कडेन तांचे उमेदवार 100 परस उण्या मतांनी हारल्यात. एक उमेदवार दोन मतांनी वेंचून आयला. प्रभागांची फेरचणूकय पर्रीकार गटाक मारक थारली आसुये. भाजपाच्या गटांत खोशयेचें ल्हार आसा. आयचें पणजेचें जैत पळयल्यार विधानसभेचे उणेच 30 तरी जागे भाजपा जिखतली, हाची खात्री आसा, अशें प्रदेशाध्यक्ष दामू नायक हांणी म्हणलां. मतदारांचो विस्वास जिखत जाल्यार हें कठीण न्हय. काँग्रेसीन, आम आदमी पक्षान हें करून दाखयलां. राज्यांत सध्या जमनी संदर्भांत सरकाराच्या विरोधांत वातावरण आशिल्ल्यान पणजे मोंसेरात पॅनल हारतलें अशें बरेच जाणकार म्हणटाले. मात, तांचे वटेन निकाल आनीक बरो लागलो.
आदलें तत्वाचें राजकारण केन्नाच सोंपलां, हें सगल्यांनीच मतींत दवरूंक जाय. आयचो मतदार आत्मकेंद्रीत. तत्व, प्रामाणीकपण, धोरणा परस मतदान वैयक्तीक फायद्याचेर आदारून चड जाता. सगल्याच फुडाऱ्यांनी, पक्षांनी नव्या ट्रेंडा प्रमाण आपले मदीं बदल घडोवन हाडला. तत्वान बी वागपी आसा जाल्यार ताकाय जैता खातीर बदलचोच पडटलो.
गरिबांक म्हारगायेंत जगप कठीण जालां. सुविधा मेळनात वा त्यो जाय आसतात. साद्या कामाक पसून लोकप्रतिनिधीच्या बंगल्याचे हुंबरे झरोवचे पडटात. देखून तांकां नोकरी दिवपी, कामां दिवपी, संकश्टाच्या काळांत धांवून येवपी, सणां- समारंभा वेळार अर्थीक मजत करपी, भुरग्यांक एडमिशन मेळोवन दिवपी, वैजकी मजत करपी लोकप्रतिनिधी आवडटा. ताका ते देवूच मानतात. हे जनसेवे खातिरूच ते वर्साचीं वर्सां वेंचून येता. तेन्ना राजकारणांत येवप्यांनी हाचे मुखार भाशणां ठोकून उपकारचीं नात, तर 24 x 7 लोकांचीं कामां करचीं पडटलीं. भौशीक कामां परस वैयक्तीक चड.
पर्रीकार पॅनलान कॅसिनो आड भुमिका घेतिल्ली. आतां म्हापालिका कॅसिनो विशीं कितें निर्णय घेता, तें कळटलेंच. स्मार्ट सिटीचीं कामां अजून चलतात. खास करून सिवरेजीचीं. रस्त्यांचेर निमाणो हात भोंवडावपाक जाय. पार्किंगेची समस्या आसाच. दिसाक 100 रुपया शुल्क सगल्यांक परवडना. येरादारीची कोंयडी, पावसांतलो हुंवार, सांतिनेज नालो.,.. बरींच कामां आसात. तीं जाग्यार घालपाचो वावर नव्या पालिका मंडळाक करचो पडटलो.
जैत हें निमाणें जैत आसता. मागीर तें दोन मतांनी जावं वा चारशे मतांनी. जैतिवंतांक परबीं. हारिल्ल्यांनी फुडले वेंचणुकेचे तयारेक लागचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
