भांगरभूंय | प्रतिनिधी
पणजी : मंत्र्यांचे कामगिरीचो नेमान आढावो घेतात. खंयचोय मंत्री बरें काम करिना जाल्यार ताका बदलपाचो अधिकार मुख्यमंत्र्यांक आसा. पक्ष नेतृत्वा कडेन चर्चा करून योग्य वेळार मुख्यमंत्री मंत्रिमंडळ फेरबदला विशीं निर्णय घेतलें. मंत्रिमंडळ फेरबदला विशीं भाशण करपाचो अधिकार आमकां ना, अशें समाजकल्याण मंत्री सुभाष फळदेसाय हांणी पत्रकार परिशदेंत म्हणलें.
मुख्यमंत्री म्हणून डॉ. प्रमोद सावंत हांणी ६ वर्सांचो कार्यकाळ पुराय केला. ह्या निमतान पणजेच्या कार्यालयांत पत्रकार परिशदेचें आयोजन केल्लें. ह्या वेळार आमदार दिलायला लोबो, आमदार केदार नायक आनी भाजपाच्या आयटी विभागाचे अध्यक्ष आदले आमदार सिद्धार्थ कुंकळयेंकार हजर आशिल्ले. मुख्यमंत्री डॉ. प्रमोद सावंत हांच्या ६ वर्सांच्या कामाचो आलेख मांडलो. सेगीत ६ वर्सां मुख्यमंत्री म्हणून राज्याचो कारभार समर्थपणान सांबाळिल्ले खातीर तांकां परबीं भेटयलीं. मोपा विमानातळ, जुवारी पूल तशेंच पुराय जाल्ल्या हेर प्रकल्पांचो उल्लेख केलो.
एनईपी खाला एप्रील सावन शिक्षणीक वर्स सुरू करपाक कांय पालकांचो विरोध जरी आसलो तरी खुबश्या जाणांचें फाटबळ आसा. सगल्यां कडेन चर्चा करूनच हो निर्णय घेतला. न्यायालय जो कितें निकाल दितलें ते प्रमाण शिक्षणीक वर्स सुरू करपा विशींचो निर्णय घेतले, अशें सुभाष फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
