भांगरभूंय | प्रतिनिधी
कामगार मंत्री बाबूश मोंसेरात हांची हमी
उद्देगीक, सरकारी खात्यांतल्या कर्मचाऱ्यांक मेळटलो लाव
भांगरभूंय I प्रतिनिधी
पणजी : दिसवड्याचेर काम करपी कामगारांच्या किमान वेतनाचो प्रस्न फुडल्या पंदरा दिसांत मार्गाक लावन ते विशींची अधिसुचोवणी जारी करतले. उद्देगीक कंपनी तशेंच सरकारी खात्यांतल्या अशा कामगारांकूय हाचो लाव मेळटलो, अशी हमी कामगार मंत्री बाबूश मोंसेरात हांणी सोमारा पत्रकारां कडेन उलयतना दिली.
चवथी मेरेन किमान वेतनाचो प्रस्न मार्गाक लागतलो, अशें कांय दिसां पयलीं मंत्री बाबूश मोंसेरात हांणी जाहीर केल्ले. ह्याच विशया वयल्यान सोमारा पत्रकारांनी तांकां विचारल्यार, तांणी दिसवड्या वयल्या कामगारांक वेतन कितले आसचें हे विशीं कांय दिसांत आपूण कामगार खात्याचे अधिकारी तशेंच मुख्यमंत्री डॉ. सावंत हांचे कडेन चर्चा केल्या.
फुडल्या पंदरा दिसांत हे विशीं मुख्यमंत्र्यां कडेन बसका घेवन किमान वेतन निश्चीत करतले आनी उपरांत अधिसुचोवणी जारी करतले, अशें तांणी म्हणलें.
उद्देगीक कंपनी तशेंच सरकाराच्या विवीध खात्यांनी दिसवड्याचेर काम करपी कामगारांक किमान वेतना लाव मेळचो ना, अशो चर्चा सुरू आसात. ताका लागून अशा कामगारां मदीं निरशेवणी पातळिल्ली, ते फाटभुंयेर मोेंसेरात हांणी सांगलें, राज्य सरकाराच्या किमान वेतनाचो लाव दिसवड्याचेर काम करपी कामगारांकूय मेळटलो, अशें स्पश्ट केले.
मजगतीं, हेर कांय राज्य सरकारांनी आपापल्या राज्यांतल्या दिसवड्याचेर काम करपी कामगारांक किमान वेतनाचो लाव दिला. हे वेतन गोंयांतल्या दिसवड्या वयल्या कामगारां परस चड आशिल्ल्यान सरकारान हाचो गांभीर्यान विचार करून किमान वेतन दर वाडोवपाची मागणी कामगार संघटणां कडल्यान जाताली. ताका लागून कामगार मंत्रीपदाची सुत्रां स्विकारले उपरांत मंत्री मोंसेरात हांणी हो विशय हातांत घेवन खात्याचे अधिकारी तशेंच कामगार संघटणांच्यो बसकाय घेतिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
