कामगारांचे 38 लाख रुपये दिवपाक टाळाटाळकरपी मेघा व्हायट कंपनी आड पुलीस कागाळ

भांगरभूंय | प्रतिनिधी

भांगरभूंय । प्रतिनिधी
पेडणेः मोपा विमानतळाचेर उज्या सुरक्षा यंत्रणेचें काम करपी जीपी क्यू कंपनीच्या कामगारांच्या पगाराचे 38 लाख रुपये दिवपाक टाळाटाळ करपी मेघा व्हायट बांदकाम कंपनी आड मोपा विमानतळ पुलीस स्टेशनांत कगाळ केल्या. आमी सगळीं कागदपत्रां सादर करून लेगीत कंपनी पयशे दिवपाक तयार ना. चवकशी करपाक गेल्यार आमकां धांवड्यायतात आनी मारपेट करपाची धमकी दितात अशें जीपी क्यू कंपनीच्या गोपाळ यादव हांणी थळाव्या पत्रकारांक सांगलें.
मोपा विमानतळ स्टेशनाचे निरीक्षक महेश केरकार हांणी जीपी क्यू कंपनीन कागाळ केल्या.  दोनूय कंपन्यांच्या अधिकाऱ्यां कडेन चवकशी करून जाय ती कारवाय करतले अशें तांणी सांगलें.  जीपी क्यू कंपनीन युनिक इंजिनियरींग कंपनी वांगडा कशी कबलात केल्या. पगाराचे पयशे दिल्यात काय बाकी आसात हे विशींची कागदपत्रा मेळ्ळे उपरांत हो विशय सुटावो करतले अशें  मेघा व्हायट कंपनीचो अधिकारी प्रभात सत्यपाठी हांणी सांगले.
मोपा विमानतळार वेगवेगळ्या कंत्राटदार कंपन्यां कडल्यान वेगवेगळी कामां सुरू आसात. जीपी क्यू कंपनी उजो सुरक्षा यंत्रणेचे काम करता. मेघा व्हायट कंपनीचे कंत्राटदार कंपनी युनिक इंजिनियरींक कंपनीची जीपी क्यू कंपनी  सब कॉन्ट्रेक्टर आसात.  स  म्हयन्यां पयलीं युनिक कंपनीन जीपी क्यू कंपनी कडल्यान काम करून घेवपाचें बंद केलें.  मात तांच्या 50 कामगारांचे फाटल्या स म्हयन्याचे पगाराचे पयशे दिले नात. आमी सगळीं बिलां कंपनीक सादर केल्यांत. मुख्यमंत्री डॉ प्रमोद सावंत हांणी लक्ष घालून आमचे पयशे मेळोवन दिवचे अशी विनवणी गोपाळ यादव हांणी केल्या.
मोपा विमानतळाचेर काम करपी कंत्राटदार कंपन्याच्या कामगारांक वेळार पगार मेळना अश्यो कागाळी हाचे पयलीं केल्यात. पयशे वेळार मेळनात म्हणून कांय कंपन्यांनी कामां सोडल्यांत. जीपी क्यू कंपनीन आता पयश्यां खातीर मोपा विमानतळ पुलीस स्टेशनांत कागाळ केल्या. पगाराक लागून कामगारांनी कंपनीच्या मालमत्तेचें लुकसाण केल्ल्याच्यो घडणुको घडल्यात. विमातळाचें काम करपी जी एम आर कंपनीक लेखी निवेदन सादर करून तांणी पगाराचे येणे आशिल्ले पयशें मेघा व्हायट कंपनीक दिवपाक लावचें अशें मागलां. मोपा विमानतळाचे डिसेंबरच्या पयल्या सप्तकांत उक्तावण करपाचें थारलां. सद्या सगळीं काम पुराय करपाचें काम नेटान चल्लां. जीपी क्यू कंपनींन केल्ले कागाळेक लागून विमानतळ बांदकामांत सगळें सारकें चल्लां अशें मात दिसून येना.