भांगरभूंय | प्रतिनिधी
उच्च पदा वयल्यान जें कितें व्यक्त जाता, तें वैयक्तीक मत नासता, ती समाजाक दिशा दिवपी जापसालदारकी आसता.
सर्वोच्च न्यायालयान आयज फुडाऱ्यांक आनी उच्च पदांचेर बशिल्ल्या अधिकाऱ्यांक देशांत भावपण, एकचार वाडोवपाची आनी संविधानाच्या मुल्यां प्रमाण उलोवपाची शिकवण दिली. दुस्वासान भरून ओतपी भाशणां आड याचिकांचेर सुनावणी घेतना सरन्यायाधीश सूर्यकांत, न्या. बी व्ही नागरत्ना आनी न्या. जाॅयमाल्या बागची हांणी हे निर्देश दिले. पूण ते उमथ्या कळशाचेर उदक थारपाचीच चड शक्यताय आसा. दुस्वाशी भाशणां थांबोवपाक पयलीं विचार सुदारपाची गरज आसा. कारण उलोवपाक सुरवात करचे पयलीं उतरां मनांत तयार आसतात.
आसामाचे मुख्यमंत्री हिमंत बिस्वा सरमा हांचो एक एआय (?) व्हिडियो व्हायरल जाला. ‘पाँयड ब्लॅक शाॅट’ माथाळो आशिल्ल्या ह्या व्हिडियोंत ते धवी स्कल तोपी, खाड आशिल्ल्या दोन मनशांचेर फारपेट करतना दिसतात. ताचे आड आनी मुख्यमंत्र्यांच्या भाशणां आड णव जाणांनी याचिका घाल्ली. दुस्वाशी भाशणां, व्हिडियो आड मार्गदर्शक तत्वां जाहीर करचीं, अशें याचिकांनी म्हणलां. ताचेर खंडपिठान वयलें भाश्य केलें. वैचारीक तत्वांचेर वेंचणूक लढयतात, मागीर एकमेकांचो आदर करपूय तितलेंच म्हत्वाचें. तुमचे कडल्यान असले वागणुकेची अपेक्षा ना, सगल्यांनी संविधानाक पाळो दिवचो, अशेंय खंडपिठान म्हणलां. ही याचिका एका मनशा आड आसा, तेन्ना राजकी पक्षांचो उल्लेख आशिल्ली नवी याचिका घालची अशेंय तांणी सांगलां. न्यायालयान मार्गदर्शक तत्वां नव्यान जारी कित्याक करपाक जाय? हाचे आदींच तीं जाल्यांत. आमी कायदो पाळिनात, ते तत्वां पाळटले? न्या. नागरत्ना आनी न्या. बागची हांणी पसून होच दुबाव उक्तायला. अमक्याक थारावीक उद्देशान तमके करपाक जाय, जाल्यार ताका सुदारपाक ख्यास्त होच एक उपाय. न्यायालयां, वेंचणूक आयोगान ते खातीर आनीक कडक कायदे, नेम, बंधनां घालूंक जाय. नाजाल्यार हीं दुस्वासाचीं भाशणां वाडत वतलीं.
एकचार, भावपणांतूच राष्ट्राची खरी शक्त आसता. धर्मांतल्यो आदर्श गजाली पाळ्ळ्यार मनीस वयर सरता, मात दुस्वास ताका तळाक चेंपता. जात, धर्म वेगळे आसले तरी आमी सगले निमाणें एकूच. भावपण, एकचार सांबाळून आमी भारताक बळिश्ट करपाक जाय. प्रधानमंत्री नरेंद्र मोदी देशाक म्हासत्ता करपाक सोदता, तांकां आमी हात दिवपाक जाय. आडमेळीं उबीं करूंक जायनात. उच्च पदा वयल्यान जें कितें व्यक्त जाता, तें वैयक्तीक मत नासता, ती समाजाक दिशा दिवपी जापसालदारकी आसता. विचार करिनासतना काडिल्ल्या उतरांनी वण्टी उब्यो जातात, मात विचार करून काडिल्ले शब्द पूल बांदतात, हें कोणें विसरचें न्हय.
गुन्यांव, न्यायालयीन बातम्यो, सांस्कृतीक, राजकी खबरो करपी विशिश्ट पत्रकार आसतात. तशे कांय फुडारी फक्त अल्पसंख्यांकांचेर खर टिका करतना दिसतात. ते हेर विशयांचेर उतर पसून काडिनात. मिया समाज साधनसुविधा, नोकऱ्यांचेर, जमिनींचेर ताबो मेळयतात. तांकां रिक्षाचें भाडें उणें दियात. तांकां त्रास जावचो ना, तो मेरेन ते आसाम सोडचे नात, अशीं वक्तव्यां आयल्यात. पयर हरिद्वारांतल्या गंगा घांटाचेर ‘हर की पौडीपर अहिंदूको प्रवेश निषिद्ध’ अशे फलक लागले. हिंदू जात्रा, यात्रा, काल्यांनी हेर धर्मांच्या लोकांनी दुकानां घालचीं न्हय, तांणी थंय पांय पसून दवरचो न्हय, असो एक विचार आतां सगलेच म्हणल्यार भारतीयांचो एक व्हडलो चोंबो उक्तावंक लागला.
भडक भाशणां, विचार म्हणल्यार कितें तें सोशल मिडिया धवळीत जाल्यार कळटा. ताचो देशाच्या एकवटाचेर अदृश्य परिणाम जाता आसतलो. मागीर एक दीस ताचो धपको निश्पाप लोकांक बसूं येता. कायदे खरपणान चालीक लावन व्हांवपी तोंडाचेर नियंत्रण हाडपाक जाय. नियंत्रण, बंदी बदला दुस्वास सोंपोवपाचें काम जागृत कायदो, संवेदनशील फुडारपण आनी सज्ञान नागरिकूच चड बरें करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
