भांगरभूंय | प्रतिनिधी
नवी दिल्ली, खबरां संस्था: बिहाराचे आदले मुख्यमंत्री कर्पुरी ठाकूर हांकां पयर भारतरत्न जाहीर जालां. केंद्र सरकाराच्या ह्या निर्णयाचेर बिहारी जनता खूश आसा. आयज तांची १०० वी जयंती.
कर्पूरी हे राममनोहर लोहिया आनी जयप्रकाश नारायण हांकां आपले आदर्श मानताले. बिहाराचे मुख्यमंत्री जाले उपरांत तांणी लोहिया हांचो अजेंडा चालीक लायलो. गरिबांच्या हक्का खातीर ते झुजले. तांचो जल्म २४ जानेवारी १९२४ दिसा समस्तीपूरांत जालो. तर मरण १७ फेब्रुवारी १९८८ त पाटण्यांत. तांच्या पक्षाचें नांव भारतीय क्रांती दल. खूब सादी राहणी आशिल्ल्यान तांकां जननायक म्हणटाले.
समाजवादी आंदोलनांत २५ वर्सां आशिल्ले रघू ठाकूर हांणी सांगलें : कांय लोक आरक्षणाचेर बेजार जातात. एकदा कर्पुरी भोंवडेर आसतना एका गांवांत गेल्ले. थंय एक जाण्टी बायल धांवत आयली आनी म्हणपाक लागली, तुमी गांवांत वचूं नाकात. थंय तुमच्या जिवाक धोको आसा. हाचे उपरांत हो घातपात लक्षांत आयिल्लो. हांवें गरिबां खातीर काम केल्लें. ताका लागून गरिबांनी म्हजो जीव वाटायलो, अशें कर्पुरी हांणी सांगिल्लें. एकदां हजारीबागेंत पक्षाची बसका आशिल्ली. कोळसो कामगार फुडारी रमणिका गुप्ता हांणी एका व्हडल्या उद्योगपती कडेन चर्चा केल्ली, मुख्यमंत्री तांचे कडेन च्या घेतले म्हणून. पक्षा खातीर कितेंय योगदान दियात. कर्पुरी हांणी शेठजीं कडेन च्या वेळार फकत ५०० रुपया मागले. परत येतना रमणिकान कर्पुरीजीं हांकां विचारलें, तुमी हें कितें केलें? ते पांच लाख रुपया दिवपाचे आशिल्ले.
प्रामाणिकपण फुडारी
सरकारी नोकर भरतींतलो भ्रष्टाचार आडावपा खातीर ठाकूर सरकारान १९७८ त नवे नेम केले. सप्तका उपरांत सरकार पडलें. आदीं संगनमतान भरती जाताली.
ठाकूर १९५२ त शिष्टमंडळा सयत ऑस्ट्रियेक वचपाचे आशिल्ले. तांचे कडेन कोटूय नाशिल्लो. आशिल्लो तो पिंजिल्लो. इश्टा कडेनूच मेळ्ळो ना. थंयच्यान ते युगोस्लाव्हियाक गेले तेन्ना मार्शल टिटोन तांचो कोट पिंजला तें पळयलें आनी रोखडोच तांकां नवो कोट घेवन भेट दिलो.
कर्पूरी ठाकूर २२ डिसेंबर १९७० ते २ जून १९७१ आनी २४ जून १९७७ ते २१ एप्रील १९७९ मेरेन दोन फावटी बिहाराचे मुख्यमंत्री आशिल्ले.
गूढ मरण
कर्पुरी ठाकूर हे हायब्लड प्रेशर आनी काळजाचे दुयेंती आशिल्ले. अशे परिस्थितींत मीठ तांचे खातीर वीख. तरी लेगीत सांख्य योगक्रिया खाला अतुलानंद हांणी तांकां १६ फेब्रुवारी १९८८ दिसा ‘रॉक मीठ’ घाल्लें तेरा लिटर उदक पिवयलें. दुसरेच दीस १७ फेब्रुवारीक हॉस्पिटलांत कर्पुरी ठाकूर हांकां मरण आयलें. हे अतुलानंद म्हणल्यार नेमके कोण हें आजूनय कळूंक ना. ताची चवकशी करपाची मागणी आयज पसून जाता.
कर्पूरी ठाकूर हांच्या मरणा उपरांत हेमवंती नंदन बहुगुणा तांच्या गांवांत आशिल्ले. तेन्ना कर्पूरी हांच्या घराण्याचीं आदली खोप पळोवन तांकां रडूंक आशिल्लें.
सत्तरच्या दशकांत पाटणांत सगले आदले आनी सध्याचे आमदार हांकां सवायभितर जमीन दिल्ली. पूण कर्पुरी ठाकूरान ती घेवंक ना. तेन्ना कांय आमदारांनी तांकां म्हणलें, तुमी जमीन घेयात, नाजाल्यार तुमचे भुरगे खंय रावतले. ताचेर तांणी सांगलें, गांवाक वचून रावतले.
चलयेच्या लग्ना वेळार ते न्हवरो सोदपाक स्वताची गाडी घेवन गेल्ले. लग्न देवळांत करपाक सोदताले. पूण बायलेन आग्रो धरिल्ल्यान तें देवळांत जालें. त्या लग्नाचें तांणी आमदारांक पसून आमंत्रण दिवंक नासलें. घरचे घरा तें लग्न जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
