भांगरभूंय | प्रतिनिधी
आयच्या गोंयांत जंय अदीं- मदीं धर्मभेदाचें वारें व्हावंक लागलां, त्या गोंयांत एकचार तिगोवपी आनी हिंदू – क्रिस्तांव भावा- भयणांक लागीं हाडपी म्हणल्यार सुचिता नार्वेकारान बरयिल्लें आनी सुशांत नायक हांणी दिग्दर्शीत केल्लें, वासंती फेम राजदीप नायकान भुमिका साकारिल्लें तियाटक म्हणल्यारच काणी नव्या युगाची. तियात्र आनी नाटकाचो हो आगळो- वेगळो सुमेळ.
कला चेतना वळवय संस्था फांटली सेगीत कितलीशींच वर्सा कोंकणी रंगमाचयेक मोलादीक योगदान दित आसा. हालींच तांच्या ‘गांव जाला जाण्टो’ ह्या नाटकाचे 18 मे क एकाच दिसा 7 प्रयोग जाले. हो विश्वविक्रम करून तांणी कोंकणीच्या माथ्यार मानाचें पांख जोडलां.
हेच संस्थेचें आनीक एक नाटक म्हणल्यार काणी नव्या युगाची. 17 ऑगस्ट दिसा ह्या नाटकाचो एक यशस्वी प्रयोग काणकोणच्या रवीन्द्र भवनांत जालो.
नवें शिक्षणीक धोरणाचेर (NEP) आदारिल्लें हें नाटक. एनईपी सद्या गोंयकारा खातीर नवो आनी मात्सो उसरांच पचपी विशय. कारण तो समजूंक मात्सो कुस्तार. मात तातूंत लिपला भुरग्यांचो खरो फुडार. म्हुण तर ल्हपीकतायेन, हांसोवन, सोंप्या उतरांनी समजावपी नाटक सुचिताबायन पानार देवयलें आनी तितलेच ल्हपीकतायेन कलाकारांनी तें माचयेर खेळयलें.
फक्त एईपीचो विशय न्हय तर ताचे बरोबर समाजांतल्यो सुक्ष्म पूण मार्मिक गजालींचो आस्पाव ह्या नाटकांत केला. मागीर ती आवय- बापायचें पालकत्व जावं वा समाजांत शिक्षण आनी टक्केवारीच्या नाड्यार चलपी घोळ जावं सगळें ह्या नाटकाच्या माध्यमांतल्यान प्रेक्षकां मेरेन पावोवपाचो यत्न केला. कळटां- नकळटां हें तियाटक हांसयता -हांसयता चिमटो काडून गेला. खरें म्हणल्यार आयच्या आमच्या समाजाक जागोवपाक हो चिमटोच गरजेचो.
काणी नव्या युगाची नाटकांत मेजून आठ कलाकार आसात. आनी आठूय जाणान आपलें पात्र बेस-बरें निभयला. तशेंच देहान व्हडलें जावन लेगीत भुरग्याचें पात्र साकारून तें तडीक व्हरपी राजदीप नायक आनी राजेश लोहिया हांची तुस्त मात्शी चडूच. कारण आपल्या भुरग्या पात्रांतल्या तोंडांतल्यान लुडबें, पूण स्पश्ट विचार प्रेक्षकां मुखार तांणी पावोवपाचें काम केलें.
कोंकणी भाशेंत नाटकांच ना वा फक्त कॉमेडीच नाटकां येतात तातूंत कांयच समाजीक विचार आसनात म्हणप्यांक काणी नव्या युगाची तशेंच कला चेतना वळवयचीं हेर नाटकां सणसणीत जाप आसात. काणी नव्या युगाची हें नाटक आनी कला चेतना वळवय, कोंकणींच्या आनी वेवसायीक नाटकाचें नवें यूग घडयतली हांतूंत मात्तूय दुबाव ना.
देविता खुळे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
