भांगरभूंय | प्रतिनिधी
साठा सत्तरीचे मातयेतली काणी, सत्तरींतले मातयेंतलें नाटक आनी सत्तरीच्याच मातयेतले एकूण 57 कलाकारां सयत, घेवन येता….
सत्तरींतलो श्रीसांतेरी कलामंच फाटलीं चार वर्सां फाटोफाट कला अकादमीच्या मराठी, कोंकणी नाट्य सर्तींनी वांटो घेता. पयलें नाटक विजय तेंडुलकर हांचें ‘विठ्ठला’ सादर केल्लें, दुसरें तेजस कुलकर्णी हांणी रूपांतरीत केल्लें ‘आ कारिसा विनिनोसा’ हें नाटक. वसंत भगवंत सावंत हांणी रूपांतरीत केल्लें ‘निमणो पेलो’ आनी पोरूं शिवप्रणव अळवणी हांचें ‘फुक्या सवाय’ हें नाटक केल्लें.
ह्या सगळ्या नाटकांचें दिग्दर्शन केल्लें म्हजो वांगडी वैभव गुरूदास नायक हाणें. सगळ्या नाटकांक इनामां तर मेळ्ळींच, पूण त्या निमतान बरे वांगडी कलाकार, प्रशिक्षित कलाकारां वांगडांय काम करपाचो एक वेगळो अणभव मेळ्ळो. तो म्हजे खातीर खूब मोलाचो. ‘विठ्ठला’ सारकें नाटक सर्ती पुरतेंच दवरिनासतना ताचे गांवांनी पंधरा प्रयोग केले. ‘फुक्या सवाय’ नाटकाचे प्रयोग आजूनय चालू आसात. सगळ्या नाटकांच्या वेवस्थापकाचें काम पळयलें, पूण नाटक दिग्दर्शीत मात केन्ना करूंक नासलें.
फाटल्याच वर्सा स्पर्धे खातीर ‘कुडणेश्वर महालक्ष्मी नाट्यमंडळ’ संस्थेचें ‘तनमाजोरी’ हें नाटक दिग्दर्शीत करपाची संद मेळ्ळी. दुर्गेश माजिक हांणी बरयिल्लें ‘रानतळी वागाचो बळी’ हें बालनाट्य बालभवना खाला दिग्दर्शीत करून सादर केलें. दोनुय नाटकांक लोकांनी खूब मोग दिलो.
ह्या वर्सा कला अकादमी आयोजित 50 वे कोंकणी नाट्य सर्तींत ‘श्रीसांतेरी कलामंच सत्तरी’ हे आमचे संस्थे खाला हांव पयलेच फावट दिग्दर्शन करतां, तें डॉ. प्रकाश रमाकांत वजरीकार हांणी बरयिल्लें कोंकणी नाटक ‘काणी तशी जुनीच… पूण?’ हें नाटक. ताचो पयलो प्रयोग 2002 ह्या वर्सा जाल्लो. आतां 23 वर्सा उपरांत दुसरो प्रयोग 1 नोव्हेंबराक, येता त्या शेनवारा फोंडेंच्या राजीव गांधी कलामंदिर जातलो.
साठा सत्तरीचे मातयेतली काणी, सत्तरींतले मातयेंतलें नाटक आनी सत्तरीच्याच मातयेतले एकूण 57 कलाकारां सयत, घेवन येता श्रीसांतेरी कलामंच सत्तरी निर्मित…. काणी तशी जुनीच… पूण? मुजरत एक वेगळो प्रयत्न तुमी पळोवंक येवचें आनी कलाकारांची उमेद वाडोवची… मोग आसचो..
शाबलो गांवकार
नाट्य कलाकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
