काणी काणी कोतवा-40

भांगरभूंय | प्रतिनिधी

दोगां हुंदीर भावांची काणी

दोग हुंदीर भाव आशिल्ले. एक भाव शारांत जाल्यार दुसरो गांवांत रावतालो. ते चवथीचे दीस आशिल्ले. सगळे जाण चवथीक गांवांत परतताले. ते प्रमाण गांवांत चवथीक जायतें खाण मेळटलें हे आशेन शारांतलो हुंदीर गांवांत आयलो.

ते दोगूय जाण एका घरांतले बंद कुडींत रावताले. दोगूय भाव एकमेकांक मेळ्ळे. गांवांतल्या हुंदरान फराळ म्हणून आपल्या भावाक कांय धान्य खावपाक दिलें आनी ताचे वांगडा उदक पियेवपाक दिलें. भावान दिल्लें धान्य खायनाफुडें शारांतल्या हुंदराक शिंकेर शिंको येवपाक लागल्यो. ताका भरडिल्लें धान्य खावपाची संवय नाशिल्ली. गांवांतल्या भावाक शारांतल्या भावाची अवस्था पळोवन भंय दिसलो. तांणी बेगेबेगीन ताका उदक पियेवपाक दिलें. मात्श्या वेळान शारांतल्या हुंदराच्या जिवाक बरें दिसलें.
उपरांत शारांतल्या हुंदरान गांवांतल्या हुंदरा कडेन शाराची तोखणाय करपाक सुरवात केली. आपल्या भावाक शाराक एकदां तरी भेट दी अशें ताणें सांगलें. गांवांतल्या भावान शारांत येवपाक हयकार दिलो आनी ते न्हिदपाक गेले. गांवांत सगळ्या लोकांगेर चवथ आशिल्ली. ताका लागून ते गांवांत पांच दीस रावले. गणपतीचें वाहन मुषक आशिल्ल्यान त्या दिसांनी गांवचे लोक मुद्दम हुंदरांक बरें बरें खावपाक हाडून घालताले. त्या दोगांयनी भरपूर चवथीचें खाण खालें आनी उरिल्लें शारांत वतना वाटेक खावपा खातीर सांठोवन दवरलें. गांवांतल्या गणरायाचें विसर्जन केले उपरांत ते दोगूय सव्या दिसा शारांत वचपाक भायर सरले. वाटेक त्या दोगांयनी गांवांतल्यान हाडिल्लो सगळो फराळ सोंपोवन उडयलो.
ते शारांत पावले. शारांतलो हुंदीर एका घराचे व्हडले गॅरेजींत रावतालो. शारांतलो तो चकचक गांवांतल्या हुंदराक आकर्शीत करतालो. शारांत पावता म्हणसर गांवांतल्या हुंदराक बरीच भूक लागिल्ली. तांणी आपल्या शारांतल्या भावाक कितेंय खावपाक या म्हणून सांगलें. ते दोगूय तांच्या फाटल्या दारांतल्यान घरा भितर सरले. शारांतल्या हुंदरान ताका गॅरेजीच्या धनयाच्या घरांतले रांदचे कुडींत व्हेलो. ल्हव ल्हव ते डायनींग हॉला मेरेन पावले. त्या घरांतल्या सगळ्यांचो नाश्तो करून निक्तोच सोंपिल्ल्यान डायनींग टेबलाचेर जायतें खावपाक उरिल्लें. त्या दोगांयकूय मेजावेली केक, ब्रेड, बटर बी पळोवन जिबेक रूच सुटली. ते डायनींग टेबलाचेर वयर चडून केक खावपाक लागले. गांवांतल्या हुंदरान केक पयलीच फावट खाल्ली. ताका तीन खूब आवडली. ते दोगूय ती खावपाक गुल्ल जाले.

इतल्यान तांकां गुर्रऽऽ गुर्रऽऽ करून आवाज आयलो. गांवच्या हुंदान कच्च करून आंग काडलें. शारांतल्या हुंदराक हाची संवय आशिल्ली. त्या बंगल्याच्या धनयान दार उघडलें आनी दोग सुणे केन्ना तांचे फुडें येवन उबे रावलें तांकां कळुंकूच ना. शारांतलो भाव शिटूक आशिल्लो. तांणी परिस्थिती वळखून आपल्या भावाक घेवन थंयच्यान पळ काडलो.
शाराक पळोवन आकर्शीत जाल्ल्या गांवांतल्या हुंदराक एकाच दिसान शारांतली सगळी परिस्थिती समजली. उपरांत तो दुसर्‍याच दिसा फांतोडेर शांत जीण जगपा खातीर शारांतल्यान गांवांत वचपाक भायर सरलो. वांगडा ताणें शारांत आनीक केन्नाच पांय दवरचो ना होय निश्‍चेव केलो.

देख: जर तुमची जीण सुरक्षीत ना जाल्यार तुमकां शांतिकायेन जगप सामकें कठीण. ताका लागून जिणेंत सुरक्षितताय आनी शांतिकाय सगळ्यांत म्हत्वाची.