काणी काणी कोतवा-30
भांगरभूंय | प्रतिनिधी
दुकानदार आनी हती
एका गांवांत एक पाळीव हती रावतालो. सगळे गांवचे लोक त्या पाळिल्ल्या हतयाची काळजी घेताले आनी ताका कितें कितें हाडून खावपाक घालताले. त्या गांवांतल्या सगळ्या लोकांचो तो लाडको आशिल्लो आनी सगळे जाण ताच्यो खूब अपुरबायो करताले. हतीय सगळ्यांचेर खूब मोग करतालो. तो खूब हुशारूय आशिल्लो.
ही काणी हांगा पळयात: https://www.facebook.com/bhaangarbhui/videos/869105688386487
त्या गांवांत एक देवूळ आशिल्लें. हती सद्दां सकाळीं त्या देवळांत वतालो. देवळांत वतना तो वाटेर एका दुकानाचेर रावतालो. तें दुकान फुलांचें आशिल्लें. हती येना फुडें त्या दुकानांतलो दुकानदार त्या हतयाचे सोंडयेंत सद्दां एक फुलांचो हार दितालो. हती तो फुलांचो हार सोंडयेंत धरून मिरयत-मिरयत देवळांत व्हरून देवाच्या पांयां कडेन ओंपतालो. जेन्ना हती तो फुलांचो हार सोंडयेंत धरून मिरयत देवळांत वतालो तेन्ना लोक ताका उमेदीन पळयताले. लोक ताची खूब तोखणायूय करताले. हतयाची श्रद्धा हो सगळ्या गांवच्या लोकांचो चर्चेचो विशय जाल्लो.
एक दीस दुकानदार सामको चिंतेस्त जावन दुकानाचेर बशिल्लो. सदचे संवये प्रमाण हती दुकाना मुखार येवन उबो रावलो. दुकानदार सामको चिंतेस्त आशिल्लो. हतयाक पळोवन तो बरोच तिडकलो. हती बाबडो दुकाना भायर रावून फुलांच्या हाराची वाट पळयतालो. दुकानदार तिडकीन भायर आयलो आनी सामको बेजारिल्ल्या त्या दुकानदारान हतयाचे सोंडयेंत फुलांचो हार घालचे बदला ताचे सोंडयेक सूय तोंपली. दुकानदारान कारण नासतना आपलो राग हतयाचेर काडलो. फुलां बदला नेटान सूय तोपिल्ल्यान ती सूय हतयाक बरीच दुखली. ताका त्या दुकानदाराची तिडक आयली. आपल्याक ह्या दुकानदारान कारणा बगर त्रास दिल्ले खातीर हतयान त्या दुकानदाराक धडो शिकोवपाचें थारायलें.
दुसर्या दिसा हतयान दुकाना कुशीकच्यान व्हांवपी व्हाळांतलें चिखलाचें उदक आपले सोंडयेन भरलें. उदक तशेंच सोंडयेंत घेवन तो दुकाना वटेन गेलो. दुकाना कडेन पावतांच हतयान सोंडयेंतलें घाणयारें उदक दुकानदाराच्या दुकानाचेर नेटान मारलें. दुकानदाराच्या फुलां आनी हारांचेर तें घाणयारें उदक बसलें आनी ताचो सगळो माल पिड्ड्यार जालो. उपरांत त्या दुकानदाराक स्वताची चूक कळून आयली. ताचे एके चुकीक लागून त्या दुकानदाराक बरेंच लुकसाण सोंसचें पडलें. ताच्या वायट कर्माचें फळ दुकानदाराक रोखडेंच मेळिल्लें.
हेवटेन हती सोंडयेन तें उदक मारून थंयच्यान वता आनी त्या दुकानाचेर परत केन्नाच येना.
देख: दुसर्याचें वायट केल्यार पदराक वायटूच पडटलें. जशाक तशें भोगचेंच पडटलें. ताका लागून दुसर्याचें बरें करून पळयात. तुमचेंय बरें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
