भांगरभूंय | प्रतिनिधी
देव आनी भिकारी
एक भिकारी आसलो. तो भीक मागून आपलें पोट भरतालो. ताका भीक मागून जें कितें मेळटालें तें तो खातालो ना जाल्यार उदक पिवन उपाशींच न्हिदतालो. भीक मागतना तो दिसभर देवाचें नांव घेतालो. ताचो एकूय दीस देवाचें नांव घेतल्या बगर वचनासलो. एक दीस देवाक ताचें चुरचुरे दिसलें आनी देव ताचेर प्रसन्न जालो.
भीक मागतना देव त्या भिकार्या मुखार प्रकट जालो. देवाक पळोवन भिकारी खूब खूश जालो. कांय वेळ देवाक तो पळयतूच उरलो. देवान भिकार्याक साबुद्दीर हाडीत म्हणलें, ‘‘हांव तुज्या त्रासांक चुरचुरून आनी तुजे भक्तीक पळोवन प्रसन्न जालां. तुका कितें जाय तें माग. मागतना मात्सो विचार कर आनी माग. हांव तुका एकूच गजाल दितलों आनी हांगच्यान वतलों.’’
भिकार्याक कितें मागचें हें सुचना जालें. तांणी मात्सो विचार करून म्हणलें, ‘‘देवा, परमेश्वरा म्हाका भांगराचे नाणे जाय. हांव ते घेवन म्हज्यो सगळ्यो इत्सा पुराय करतलों.’’
देवान म्हणलें, ‘‘बरें तूं जें मागता तें हांव तुका दिता. भांगराचे नाणे जाय मरे तुका? बरें दिता! मात तूं ते नाणे कित्यांत घेतलो?’’
अशें विचारना फुडें भिकार्यान रोखडीच जाप दिली, ‘‘हांव ते नाणे म्हजे हे पोतयेंत घेतलों.’’ अशें म्हणीन भिकार्यान ताचे कडेन आशिल्ली कपड्याची पोती देवा मुखार केली.
नाणे ताचे पोतयेंत घालचे पयलीं देवान भिकार्याक म्हणलें, ‘‘ हांव तुजे पोतयेंत नाणें उडयत वतलों. जेन्ना तूं म्हाका राव म्हणटलो तेन्नाच हांव रावतलों. मात एक गजाल लक्षांत दवर, जर तुजे पोतयेंतल्यान एक पसून नाणो सकयल जमनीर पडलो जाल्यार ताची माती जातली. वांगडा तुजे पोतयेंत आशिल्ल्या सगळ्या नाण्यांचीय माती जातली.’’
भिकार्यान देवाची अट मान्य केली. देव भिकार्याचे पोतयेंत नाणे घालीत रावलो. ते नाणे पळोवन भिकार्याक भांगराची आनीक आशा जाली. ताचे दोळे चकचकले आनी ताका आपली पोती फुटपाक पाविल्ल्याचें कळूंक लेगीत ना. जशी पोती जड जाली तशें ताच्या लक्षांत आयलें आतां आपली पोती फुटपाक पावल्या म्हणून. मात ताचे कडेन तांणी लक्ष दिवंक ना. ताका आशा जाल्ल्यान ताणी देवाकूय आडावंक ना. निमाणें जें जावपाक जाय आसलें तेंच जालें. पोती फुटून सगळीं नाणीं जमनीर पडलीं आनी ताची माती जाली. तें पळोवन भिकारी रडपाक लागलो. दुसरे वटेन देवूय थंयच्यान नाच्च जालो. समाधानी वृत्ती नाशिल्ल्यान आनी चड आशा धरिल्ल्यान तो भिकारी सासणाचो भिकारीच उरलो.
देख: खंयचेच गजालीची अती आशा दवरची न्हय. जें कितें तुमचे कडेन आसा तातूंत समाधानी आनी खूश रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
