भांगरभूंय | प्रतिनिधी
मेस्त आनी रानवटी सुणो
एका गांवचो एक मेस्त शेजराच्या गांवांत कामाक वतालो. हो गांव सुमार १० किलोमिटर पयस आशिल्लो. ताका लागून त्या मेस्ताक सूर्य उदेवचे पयलीं कामा खातीर घरांतल्यान भायर सरचें पडटालें. कामाक वतना ताका वाटेक रान लागतालें. एक दीस तो सदचे वरीं कामाक वचपाक फांतोडेर भायर सरलो. रानांतल्यान वतना ताका कसलो तरी आवाज आयकुपाक आयलो. तो चलतां चलतां थंयच उबो रावलो. तांणी लक्ष दिवन तो आवाज आयकलो आनी आवाजाचे दिकेन तो वचपाक लागलो. कांय अंतराचेर एक रानवटी सुण्याचें पील एका फोंडकुलांत पडलां तें ताचे नदरेक पडलें. तांणी त्या पिलाक फोंकुलांतल्यान भायर काडलें. भायर काडिना फुडें त्या पिलान त्या मेस्ताचे हात चाटले. मेस्तान पिलाचे तकले वयल्यान हात भोंवडायलो. ताचे पांय चाटून तें पील थंयच्यान गेलें. मेस्ताक त्या पिलाची अपुरबाय दिसली. उपरांत तो मेस्तूय थंयच्यान कामाक गेलो. तो पुराय दीस त्या पिलाचेंच चिंतपाक लागलो.
तो दुसरे दिसाय पील पडलेलें ते सुवातेर परत गेलो. तें पील थंयच आशिल्लें हें पळोवन मेस्ताक अजाप दिसलें. मागीर तीं सदांच मेळपाक लागलीं. मेस्त पिलाक घरा कडल्यान खावपाक घेवन येतालो. हें पळोवन हेर रानवटी सुणेय मेस्ताच्या लागीं येवपाक लागले. तो त्या सगळ्यांक घरा कडल्यान कितें ना कितें खावपाक हाडटालो.
एक दीस ह्या रानवटी सुण्यांचेर एका वागाची नदर पडली. तो सुण्यांक बरोच त्रास करपाक लागलो. तो सद्दां तांचेर हल्ले करतालो. ताका लागून दर दिसा एक तरी रानवटी सुणो ताचे भकीक पडटालो. हें सगळें पळोवन मेस्तूय चिंतेस्त जालो. ताका एक आयडिया सुचली. त्या रातचो तो रानांतूच रावलो. वाग आयलो. वाग येना फुडें सगळे सुणे ताका लिपून भोंकपाक लागले. मात मेस्तान ज्या पिलाक वाटायल्लें त्या पिलाक एका झाडाक बांदलें. वागान त्या पिलाक पळयलें. आयतें जेवण तोंडा मेरेन आयिल्लें पळोवन वागान ताचेर घुरी घातली. घुरी घालिना फुडें मेस्तान पिलाक आपले वटेन ओडून काडलें. वाग थंयच कुशीक आशिल्ल्या फोंडकुलांत पडलो. वागाक पडला तें पळोवन लिपून भोंकतल्या सगळ्या सुण्यांनी ताचेर वांगडाच हल्लो केलो आनी ताका मारून उडयलो. मेस्तान बांदिल्ल्या पिलाक सोडलें. मागीर सगळे रानवटी सुणे मेस्ता म्हर्यांत आयले. मेस्तान त्या सगळ्यांक खावपाक घातलें आनी तो घरा परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
