भांगरभूंय | प्रतिनिधी
काणकोण : 9 म्हयन्यां आदीं उक्तावण केल्ल्या काणकोण रवीन्द्र भवन प्रकल्पांत उदक सांचप ही धपको दिवपी तशेंच लजेची गजाल, अशें मत काणकोणचे आमदार तशेंच सभापती रमेश तवडकार हांणी रवीन्द्र भवनाची पळोवणी केले उपरांत उक्तायलें.
आठ वर्सां आदीं त्या प्रकल्पाच्या बांदकामाक सुरवात जाल्ली. मात अंदीं पयल्या पावसांत वाचपघरांत उदक सांचपाचो जो प्रकार घडला, ताचें आपल्याक अजाप दिसता. संबंदितांनी रवीन्द्र भवनाचे देखभाली कडेन लक्ष दिवपाक जाय आसलें, अशें तवडकार हांणी सांगलें.
ह्या वेळार काणकोणचे उपजिल्होधिकारी प्रतापराव नायक गांवकार, गोंय साधन सुविधा म्हामंडळाचे अधिकारी जोशी आनी हेर मानेस्त हाजीर आसले. सभापतीन पुराय इमारतीची पळोवणी केली आनी परिस्थिती समजून घेतली. ते इमारतीच्या पांख्या वयल्यान उदक व्हावून वचपा खातीर जें पायप सोडलां, तातूंत कोयर सांचिल्ल्यान ही परिस्थिती निर्माण जाली, अशी म्हायती जोशी हांणी दिली. सध्या रवीन्द्र भवनांत जावपी कार्यावळी तात्पुरत्यो बंद दवरल्यात. तंत्रीक काम पुराय जाले उपरांत रवीन्द्र भवन परतून उक्ते करतले, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
