भांगरभूंय | प्रतिनिधी
काणकोण: गोंय आनी उत्तर कर्नाटक वाठारांत श्रीस्थळ काणकोणचो श्रीदेव मल्लिकार्जून जागृत दैवत म्हूण नामना आसा. ईश्वर आनी पर्वतीचें अस्तित्व आशिल्ल्या ह्या देवस्थानांत पुर्विल्ल्या काळा सावन चलत आयिल्ल्या विवीध परंपरीक रुढी आनी रितीरिवाज आयज मेरेन व्हड उमेदीन मनयतात.
पौष शु. पौर्णिमा ते फाल्गून षष्ठी ह्या दोन म्हयन्याच्या काळांत काणकोण आनी कर्नाटक वाठारांत श्री अवतारपुरूश देवाचो संचार, तरंगोत्सव, घरवई वयलो अवतार, कौल आनी तळय अशे दैवी अनुभुती आशिल्ले प्रकार अणभवूंक मेळटात. ह्या काळांत देवाची तरंगां, गडे, भगत, मेळ आनी संबंदीत सेवेकारांचो लवाजमा पुराय वाठारांत भोंवत आसता. थारावीक तिथी प्रमाण दरेक घरवईचेर देवाचो अवतार (अवसर) पार पडटा आनी थंयच्या संबंदीत कुटुंबांक कौलप्रसाद दितात.
अंदूं श्रीअवतारपुरूश देवाचो नामनेचो तरंगोत्सव शुक्रार 26 जानेवारी 2024 सावन सुरू जाता. देवाची तरंगा आनी गडे आदल्या दिसा आसाळी, खालवडे आनी मैथळ (भाटपाल) ह्या तीन मुखेल घरवईचेर (मठांत) एकठांय जातले. तिनूय मेळांची परंपरे प्रमाण प्रतिश्ठापना करून फांतोडेर अवतार कृत्यार सुरवात जातली.
शुक्रारा सकाळीं 11 वरांचेर श्रीस्थळ हांगा श्री मल्लिकार्जून देवस्थानाच्या प्राकारांत खळ्ळेवरील अवतार जातलो आनी सगल्यांक कौलप्रसाद दितले. भाविकांनी शांतताय पाळून कौल घेवचो अशें आवाहन केलां. उपरांत सांजे अवताराचें विसर्जन जातलें आनी तरंगां देवळांत वतलीं.
उपरांत कांय दिसांनी म्हाल वेळीप, म्हाल देसाय, खालवडेची घरवय आनी मैथळची घरवय हांगा तळय घेवन श्रीअवतार पुरूश देवाचो लवाजमा शिवेश्वर महालांत (उत्तर कर्नाटक) आपले कुळावी आनी भक्तांक दर्शन दिवपा खातीर प्रयाण करतले. हो लवाजमा कर्नाटकांतल्या पंटलबाग, मुडगेरी, नागफोंड, सदाशीवगड, बाड, मक्केरी, चेंडिये, किन्नर, बोळये, हळगा, हुळगा, हणकोण आनी गोपिशीट्टा ह्या वाठारांत भोंवून तळयो घेतले आनी तशेंच मुखार होन्नावर, मंकी, कैगा, कुंभारवाडो, जोयडा आनी उळवी हांगाच्या रामनगर मार्गान सांगें सावन गांवडोंगरी कुडेवाडा हांगा आगमन जातलें.
मदेकांत काळी न्हंयेच्या पेल्यान सकली मक्केरी, वयली मक्केरी, चेंडिये, किन्नर आनी खारगा ह्या पांच सुवातांनी अवतार पुरुशाचो अवसर जातलो. उपरांत कुळावी आनी भाविकांक कौलप्रसाद दितले. हे धामधुमींत वेळेचे उपलब्धते प्रमाण बैलूर, बैंदूर, बारखूर आनी हळदीपूर ह्या वाठारांतूय देव आपले कुळावी आनी भाविकांक दर्शन आनी आशिर्वाद दिता.
कर्नाटकांतली यात्रा सोंपाेवन श्रीअवतार पुरुशाचो लवाजामा फाल्गुन म्हयन्याचे सुरवातेक काणकोण महालांत पुनरागमन करता आनी काणको महालांतले आपले महाजन, कुळावी, ग्रामस्थ आनी भाविकांक आशिर्वाद दिवपाक खालवडे सावन अवतार, कौलप्रसाद आनी तळयो कार्यावळीक सुरवात जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
