भांगरभूंय | प्रतिनिधी
भांगरभूंय । प्रतिनिधी
काणकोणः देळें- काणकोण हांगच्या श्री मल्लिकार्जुन आनी चेतन मंजू देसाय म्हाविद्यालयांत 18 आनी 19 ऑगस्टाक दोन दिसांचो आंतरराष्ट्रीय साहित्योत्सव आनी परिशदेचें आयोजन केलां. साहित्योत्सव मल्लिकार्जुन म्हाविद्यालयान इंटरनॅशनल जर्नल ऑफ क्रिएटीव्ही लिटरेचेर, आर्ट ट्रान्सलेशन अँड रिसर्च फॉर पीस अँड ह्युमेनिटी हांच्या जोड पालवान आयोजीत केला. साहित्य आनी संशोधन मळावयले देश- विदेशांतल्या मानेस्त आनी कलाकार तातूंत वांटेकार जातले.
मानवता आनी शांती खातीर कला आनी साहित्य हो परिशदेचो विशय आसा. ज्ञानपीठ पुरस्कार जैतिवंत गोंयकार साहित्यीक दामोदर मावजो कार्यावळीक मुखेल सोयरे म्हणून हाजीर रावतले. साहित्योत्सवांत पुस्तक प्रकाशन, सोद निबंद वाचन, इंग्लिश काव्य वाचन तशेंच कला प्रदर्सन आनी हेर कार्यावळी जातल्यो.
डॉ वासुदेव चक्रवर्ती, जॅन रसेल, लुसिय़ा तापाझो, लिगिया तोमोईगा हें आंतरराश्ट्रीय नामनेचे कला आनी साहित्य विशारद ह्या परिसंवांदात वांटेकार जातले. मल्लिकार्जुन म्हाविद्यालयाचो प्राचार्य डॉ मनोज कामत आनी ओरबिंदू गंगा हे परिशदेचे निमंत्रक आसात. म्हाविद्यालयाच्या कोंकणी विभाग मुखेल डॉ पूर्णानंद च्यारी आनी इंग्लिश विभाग मुखेली विविध पाऊसकार आयोजन संयोजक आसात. आयोजन समितींत डॉ तेजस्विनी पाटील, डॉ कल्पना गंगातिरकार, डॉ सविता पाटील खोटावले, डॉ रुपा च्यारी, आदिती बर्वे, हेमंत अय्या, प्रेमजीत वेळीप आनी उल्का कालेकार हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
