भांगरभूंय | प्रतिनिधी
कंत्राटदाराक जीसूडा वतीन कारणां दाखल नोटीस
भांगरभूंय । प्रतिनिधी
काणकोणः काणकोण पालिकेन आपली पोरणी कार्यालय इमारत मोडून थंय भोवउद्देशी इमारत प्रकल्प बांदपाक सुरवात केल्या. गोंय सरकाराच्या गोंय राज्य शार उदरगत (जीसूडा) संस्थे वतीन हें बांदकाम चल्लां. हें काम सामकेंच कांसवाचे गतीन सुरू आशिल्ल्यान जीसूडाचे वांगडी सचीव गुरुदास पिळर्णकार हांणी ते इमारत बांदकाम कंत्राटदाराक कारणां दाखय नोटीस जारी केल्या. ही म्हायती काणकोणचे नगराध्यक्ष रमाकांत नायक गांवकार हांणी दिली.
हे इमारतीच्या बांदकामाक पोरूं सुरवात जाल्ली. 18 म्हयन्या भितर हें काम पुराय जावपाक जाय आशिल्लें. मात 14 म्हयने जावन लेगीत हें काम पुराय जावपाचे वाटेर नाशिल्ल्यान ही नोटीस जारी केल्या, अशें नायक गांवकार हांणी सांगलें. मजगतीं, काणकोण पालिकेन नवी इमारत बांदून पुराय जाय मेरेन चार रस्त्यार आपलें कार्यालय हालयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
