काणकोण पालिकेची उदरगत हीच मोख; प्रभागांच्या कामांक प्राधान्य

भांगरभूंय | प्रतिनिधी

रमाकांत नायक गांवकारः काणकोणचे नगराध्यक्ष म्हूण बिनविरोध निवड

काणकोण: काणकोण पालिका वाठारांतल्या बाराय प्रभागांचे उदरगतीची माेख बाळगिल्या. हातूंत चावडी प्रभागाचें सोबितीकरण, पाळोळ्यां वचपी रस्त्याचें रुंदीकरण, पाळोळ्यां मल्टीपार्कींग, चावडेर व्हडल्या तळ्याचें सोबितीकरण, नगर्श्यां मसंडभुंयेचें नुतनीकरण, नवें नुस्त्या मार्केट बांदप हे सारकिल्लीं कामां प्राधान्याय करतलों अशें काणकोणचे नवे नगराध्यक्ष रमाकांत नायक गांवकार हांणी सांगलें.

काणकोण पालिकेचे नगराध्यक्ष सायमन रेबेलो हांणी एका अलिखीत कबलाती प्रमाण आपलो देड वर्साचो कार्यकाळ सोंपले उपरांत पदाचो राजिनामो दिल्लो. रमाकांत नायक गांवकार हांचे आड आनीक दुसरो अर्ज येवंक नाशिल्ल्यान काल (शुक्रारा) नवे नगराध्यक्ष म्हूण तांची बिनविरोध निवड जाली.

ह्या वेळार निर्वाचन अधिकारी म्हूण काणकोणचे उपजिल्होधिकारी रमेश गांवकार आनी मुख्याधिकारी मधू नार्वेंकार हांणी जापसालदारकी सांबाळ्ळी.

चार रस्त्यार नव्या नगराध्यक्षाक शुभेत्सा दिवपा खातीर भाजपाचे दक्षीण गोंय संघटण प्रभारी सर्वानंद भगत, मंडळ अध्यक्ष विशाल देसाय, खोतीगांवचे सरपंच आनंदू देसाय, श्रीस्थळचे सरपंच सेजल गांवकार, आगोंदच्यो सरपंच फातीमा रोड्रिगीश, क्षत्रीय मराठा समाजाचे अध्यक्ष महेश गांवकार, क्रितेश नायक गांवकार, चंदा देसाय, विंदा सतरकार, संजू तिळवे, सिद्धार्थ देसाय, शांबा देसाय आनी हेर मानेस्त हाजीर आशिल्ले.

ह्या वेळार महेश गांवकार हांणी काणकोणची संस्कृती तिगोवपा खातीर भर दिवपाचें आवाहन केलें.

रमाकांत नायक गांवकार हे 25 वर्सां सावन आपले इश्ट आसून काणकोण पालिका वाठाराचे उदरगती खातीर तांकां सदाच सहकार्य करतलों, आनी तांच्या हातांतल्यान विकासकामाक चालना मेळूं अशें नगरसेवक धीरज नायक गांवकार हांणी सांगलें.

काणकोण पालिका वाठारांतल्यो विवीध समस्या सोडोवपा खातीर रमाकांत नायक गांवकार हांणी यत्न करचे अशें आदले नगराध्यक्ष राजेंद्र देसाय हांणी सांगलें. रमाकांत नायक गांवकार हांकां हेर नगरसेवकांचो पुराय तेंको मेळटलो अशें आदले नगराध्यक्ष सायमन रेबेलो हांणी सांगलें.

ह्या वेळार आदले उपनगराध्यक्ष दिलीप केंकरे, बबेश बोरकार, सोयरू कोमरपंत, शंकर नायक हांची शुभेत्सा दिवपी उलोवपां जालीं. ह्या वेळार आदले नगराध्यक्ष प्रार्थना रमाकांत नायक गांवकार हाजीर आशिल्ल्यो.

कार्यावळीचें सुत्रसंचालन संजय कोमरपंत हांणी केलें.