भांगरभूंय | प्रतिनिधी
भांगरभूंय । प्रतिनिधी
काणकोणः काणकोण पालिका मंडळाची पोरणी इमारत मोडून ते सुवातेर नवो इमारत प्रकल्प बांदकामाची काणकोणचो आमदार आनी सभापती रमेश तवडकार हांणी पळोवणी करून काम दर्जेदार करपाची सूचोवणी कंत्राटदाराक केली. काम सारकें जालें ना अशें दिसून आयल्यार तें परत करून दिवचें पडटलें, अशी शिटकावणी तांणी ताका दिल्या.
बांदकाम हळू चल्लां तशेंच ते दर्जेदार ना अशी कागाळ नगरसेवक धीरज नायक गांवकार हांणी सभापती कडेन केल्ली. पालिका मंडळाचे बसकेंत लेगीत बांदकामा विशीं नाराजी उक्तायल्ली. सभापती तवडकार हांणी बिरेस्तारा बांदकामाची पळोवणी केली. तांच्या वांगडा नगराध्यक्ष रमाकांत नायक गांवकार, नगरसेवक धीरज नायक गांवकार, शुभम कोमरपंत, सारा देसाय, नादीन फर्नांडीस आशिल्ली.
काँक्रिटाच्या खांब्यांचें क्युरींग सारकें जावंक नाशिल्ल्यान ते मात्से बागवल्यात. 11 कोटी रुपया खर्चाच्या ह्या प्रकल्पाचें बांदकाम गोंय राज्य नागरी उदरगत प्राधिकरणा वतीन (जी-सुडा) हांतांत घेतलां. मात बांदकामाचेर नदर दवोरपाक तांचो प्रतिनिधी आसना हें धीरज गांवकार हाणी सभापतीचे नदरेक हाडून दिलें. बांदकामाचेर नदर दवोरपा खातीर काणकोण पालिकेच्या एका कर्मचाऱ्याक दवोरतले तशेंच जी-सूडाक पत्र धाडून तांच्या सुपरव्हायजराक धाडपाक सांगतले अशें नगराध्यक्ष रमाकांत नायक गांवकार हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
