भांगरभूंय | प्रतिनिधी
काणकोण: काणकोण पालिका मंडळाचो कार्यकाळ सोंपलो आनी काणकोण पालिकेचेर प्रशासक म्हूण शंकर गांवकार हांची नेमणूक जाली. तांणी काल (मंगळारा) आपल्या पदाचो ताबो घेतलो. ताबो घेवन जाले उपरांत तांणी सगल्यांत पयलीं काणकोण पालिकेच्या बाजार संकूल इमारतीची तशेंच नुस्त्या मार्केटाची पळोवणी केली.
मार्केटांतलें घाण उदक जें उक्तडार सोडटात ताचे पसून वाठारांत घाण पातळटा ही गजाल तांचे नदरेक हाडून दिली. उपरांत तांणी ह्या वाठाराची पालिकेचे सुपरवायजर कनय देसाय, पालिका निरिक्षक येसो देसाय हांचे सयत पळोवणी केली आनी ह्या उक्तडार सोडटल्या घाण उदकाचेर उपाय काडटले अशें तांणी सांगलें.
मजगतीं, काणकोण पालिकेचे चावडी वाठाराचे अस्तंते नगरसेवक रमाकांत नायक गांवकार हांकां ह्या घाण उदका विशीं विचारलें तेन्ना, पोरणें नुस्त्या मार्केट मोडून नवें नुस्त्या मार्केट बांदपाची निविदा मंजूर जाल्या, आनी नवें नुस्त्या मार्केट बांदतना नुस्त्याच्या घाण उदका संबंदी उपाय येवजण करपा संबंदी कंत्राटदाराक सांगिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
