भांगरभूंय | प्रतिनिधी
काणकोण : तेलंगणांतल्यान कथित पुलीस जावन आयिल्लें तिग जाण आनी एकल्यान काणकोणच्या खोला हांगासरल्या थळाव्या वेवसायिकाचें अपहरण करपाचो यत्न केलो. पूण थळाव्या लोकांच्या सादूरपणाक लागून हो यत्न अपेशी थारलो.
हे संबंदीं पर्यटन वेवसायिकान हैदराबादच्या श्रीनाथराव आनी 3 कथित पुलीस हांचे आड गोंय पुलीस स्टेशनांत कागाळ केल्या.
चड म्हायती प्रमाण, तेलंगणा नोंदणीकृत गाडयेंतल्यान चार जाण खोलाच्या मटवे हांगाच्या वेवसायीक जयेश पागीच्या घरा आयल्लें. हाचे आदीं पागी कडीन काम केल्ल्या मनशान दुकानाची चावी मागली. सामान घेवपाक जाय अशें सांगून रेस्टॉरंटांत येवपाक सांगलें. पागी मोटारींतल्या वच्चें बदला आपल्या स्कुटरीवल्यान तांच्या फाटल्यान गेलो. थोड्याच अंतराचेर पावतकच अरुंद रस्त्यार गाडी थांबयली आनी दोगांनी पागीक जबरदस्तीन गाडयेंत बसपाचो यत्न केलो. त्या वेळार पागीन मजती खातीर बोवाळ केलो तेन्ना पागीचो भाव आयलो आनी तांणी आपली कार मदीं घालून अपहरण करप्यांची गाडी आडायली. ते उपरांत थळावे लोकूय जमले. हैदराबाद पुलीस स्टेशनांत पागी आड कागाळ आशिल्ली आनी तांकां चवकशी खातीर व्हरतात अशें गाडयेंतल्या लोकांनी सांगलें.
ह्या वेळार जिल्हो पंचायत वांगडी कृष्णा वेळीप, आदले सरपंच अजय पागी आनी थंय हाजीर आशिल्ल्या हेरांक तांचेर दुबाव आयलो आनी तांणी काणकोणा पुलिसांक कळयलें. हे संबंदी जयेश पागी हांणी श्रीनाथ राव आनी तीन कथित तेलंगणा पुलिसां आड रितसर कागाळ केल्या.
मजगतीं, सुत्रांनी दिल्ले म्हायती प्रमाण, श्रीनाथ राव, पागी आनी आनीक एका थळाव्यान एकठांय पर्यटन वेवसाय सुरू केल्लो. पूण ते उपरांत तांचे मदीं मतभेद जाले आनी राव हांणे हो धंदो सोडलो. हाका लागून तांणी तेलंगणात कागाळ दाखल केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
