भांगरभूंय | प्रतिनिधी
काणकोण: खोतीगांव पंचायतीची ग्रामसभा काल (आयतारा) वादळी थारली. हे ग्रामसभेंत पिंपळामळार रानां खातें बांदत आशिल्ल्या बांदकामा संबंदी चर्चा जावपाची आशिल्ल्यान आनी हो विशय संवेदनशील आशिल्ल्यान हे ग्रामसभेक काणकोण पुलीस स्टेशनाचे पुलीस हजर आशिल्ले. ग्रामसभा सुरू आसतनाच पुलिसां मुखारूच दोन गटां मदीं केस्तांवां सुरू जालीं. ह्या ग्रामसभच्या अध्यक्षस्थानार सरपंच वृंदा वेळीप आशिल्ल्यो. तशेंच काणकोणचे आमदार आनी सभापती रमेश तवडकार, उपसरपंच पुनम गांवकार, पंच जयेश गांवकार, कृष्णा गांवकार, आनंदू देसाय, प्रशांत वेळीप, पंचायत सचीव सौ. वारीक हाजीर आशिल्ल्यो.
ग्रामसभेंत विवीध विशयांचेर चर्चा सुरू जाले उपरांत पिंपळामळार जायत आशिल्ल्या कामा संबंदी प्रस्न आयले उपरांत वातावरण तापलें. तातूंत दया गांवकाराच्या समर्थनांत आशिल्लो एक गट आनी दया गांवकाराच्या विरोधांत आशिल्लो दुसरो गट हांचे मदीं बाचाबाची सुरू जाली.
निमाणें सभापती रमेश तवडकार हांणी पिंपळामळान रानां खात्याच्या बांदकामा संबंदीत, रानां खात्याच्या वरिश्ठ अधिकाऱ्यां कडेन चर्चा करून प्रस्न सोडोवपाचे नदरेन एक समिती स्थापन करून ते समिती वरवीं हो प्रस्न सोडोवपाचो प्रसताव मांडलो. पूण रानां खात्या वतीन जें काम सुरू आसा तें पयलीं बंद करपाची मागणी दया गांवकार हांणी केली आनी उपरांत फुडली कृती करपाची मागणी केली.
ह्या वेळार जाल्ले चर्चेंत दत्ता वेळीप, अशोक गांवकार, पायक वेळीप, गेनू वेळीप, करिष्मा वेळीप, कल्पेश गांवकार, भिवा गांवकार, देविदास गांवकार, जयेश वेळीप, शाबू गांवकार, श्रीकांत गांवकार हांणी वांटो घेतलो.
ह्या वेळार सुधा गांवकार हांणी शिक्षणीक दर्जो वाडोवचो, गांवांत स्नेहसंमेलना वेळार, नाटका वेळार गडगडो आनी आनी हेर गैरमार्गान सुरू आशिल्लो वेवसाय बंद करपाची मागणी केली.
सरपंच वृंदा वेळीप आपल्या प्रस्नांक सारक्यो जापो दिनाशिल्ल्यान दया गांवकार हांणी ह्या वेळार निशेध केलो. जाल्यार कल्पेश गांवकार हांणी सदर ग्रामस्था ‘थर्ड क्लास’ अशें म्हणिल्ल्यान कल्पेश गांवकार हांणी माफी मागची अशी मागणी दुसऱ्या एका गटान केली आनी निमाणें बोवाळांतूच ग्रामसभा सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
