भांगरभूंय | प्रतिनिधी
पैंगीण : काणकोणांतलीं चडशीं हॉटेलां, बार आनी रेस्टॉरंटांनी कळम लागिल्ल्या बाटल्यांनी सोडा, थंड पेयां विकतात. भलायकेचे नदरेन हें धोक्याचें आशिल्ल्यान हे विशीं हांगच्या कांय नागरिकांनी चिंता उक्तायल्या.
ही हुस्को करपा सारकी गजाल. लोक दुयेंत पडपाक शकतात, अशें श्रीस्थळचे उपसरपंच शिवराज देशमुख हांणी सांगलें.
काणकोणां भोवतेक हॉटेलांनी सोडा आनी हेर थंड पेयाच्यो बाटल्यो दवरपा खातीर जाय तशी सुवात ना. हाचो परिणाम त्यो बाटल्यो मागीर रेस्टॉरंटाच्या भायले मेकळे सुवातेर दवरतात आनी दंव लागिल्ल्यान बाटलेचें धापणें कळमेता, अशें देशमूख हांणी सांगलें. कोल्ड ड्रिंकांच्यो बाटल्योय पोरण्यो आसात आनी संबंदीत अधिकार्यांनी अशे तरेच्या भलायकी संबंदीत गजालीं कडेन प्राधान्यान लक्ष दिवचें.
काणकोणा सामुदायीक भलायकी केंद्राच्या नितळसाण निरीक्षकांनी कळमेल्ल्या कॅप बाटल्यांची तपासणी करची आनी भलायकेच्यो समस्या टाळपा खातीर गरजेचीं पावलां उखलचीं अशी मागणी उपसरपंच देशमुख आनी हेर कांय मुखेल नागरिकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
