भांगरभूंय | प्रतिनिधी
पणजी : बोकडामळ-आगोंद, काणकोणा शुक्रारा दनपरां १.३० वरांचेर गेल्हेरमिना फर्नांडीस (५३) ही दुचाकीवेल्यान तोल गेल्ल्यान रस्त्याचेर पडली. हातूंत तिचे तकलेक बरोच मार बसलो. उपचारा मजगतीं गोमेकॉंत तिका मरण आयलें.
हे विशीं पुलिसांनी दिल्ले म्हायती प्रमाण, गेल्हेरमिना फर्नांडीस ही आपल्या घोवा वांगडा दुचाकीवेल्यान (ज्युपिटर स्कूटर) काणकोणच्यान अगोंदा वताली. बोकडामळ लागसार पावतांच अचकीत नेटान पावस आनी वारो आयलो. पावसा पसून वाचपा खातीर तिणें सत्री उगडली. मात, वार्याचो नेट इतलो व्हड आशिल्लो, सत्रेंत वारें भरलें आनी हाका लागून तिचो तोल गेलो. वेगान चलपी दुचाकीवेल्यान पडिल्ल्यान तिचे तकलेक मार बसलो. तिका उपचारा खातीर पयलीं मुळाव्या भलायकी केंद्रांत व्हेली. उपरांत दक्षीण गोंय जिल्लो हॉस्पिटलांत दाखल केली. फुडल्या उपचारा खातीर तिका गोमेकॉंत व्हेली. थंय तिका उपचारा मजगतीं मरण आयलें.
हे विशीं काणकोण पुलीस स्टेशनांत हे घडणुकेची नोंद कलम १९४ खाला अकस्मात मरण प्रकरण म्हणून केल्या. पुलीस निरीक्षक रामदास दोईफोडे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
